भोको पेट सामु पुष्पबृष्टि……

भोको पेट सामु पुष्पबृष्टि————-
भोकले छटपटाएर बसेका
मानिसलाई दाल भात दिनुको सट्टा
आनन्दले
मेरो सरकार गर्छ पुष्पबृष्टि
हे भगवान यस्तो
अन्याय देखेर पनि
आँखा नखुल्ने
कता छ तेरो दृष्टि?
बनाइस तैले कसैलाई
बालुवाटारमा गमक्क बस्ने नेता
कसैलाई टुँडिखेलमा
भात माग्न जाने मजदुर
के यही हो, तेरो सुन्दर सृस्टी?
ल नढाटेर भन त नेपाल
बनाउँदा कहाँ थियो तेरो दृष्टि?
भिटामीन ‘ए’ नपुगेपछि
राती आँखा नदेख्ने रोग लाग्छ,
भन्छन् त्यसलाई रतन्धो
हाम्रा नेतालाई ‘विवेक’ नामक
भिटामिनको कमी भएर
प्रकाशमा नै भएछ ‘दिउँसो अन्धो ’
यदि नेताका छोराछोरीले भोक
पेट टुुढीखेलमा बसेर
भात खाँदा भएको भए पुष्प बृष्टि ?
के उनले आनन्द मानेर हास्दा हुन?
वा गर्थे आँखाबाट जलबृष्टि ?

डा. अरुणा उप्रेती ।