दशैं तिहारको शुभकामना
दशैं आँगनमै आयो तिहार आउँदैछ पो
नवदुर्गा र लक्ष्मीको रागिनी गाइँदै छ पो
नयाँ रौनकले नौलो नयाँ सद्भाव ल्याउँछ
दशैं तिहारले मान्छे एकै गोल बनाउँछ
(१)
चौंडाले पिङ डाँडामा लिङ्गे पिङ यतातिर
पिङमै दङ्ग छन् सारा चिन्ता छैन कुनैतिर
उही खसी, उही मासु, उही सेल र ओखर
दशैं तिहारमा जस्तो हुँदैहुन्न बरोबर
(२)
विद्यालय नचल्नाले विद्यार्थी मग्न मस्त छन्
कपि कितावका पाना तेतीकै अस्तव्यस्त छन्
किन्तू फुर्सद पाउन्नन् नाचगान सजा-वजा
दशैं तिहारको रन्को जता हेर्यो उतै मजा
(३)
अमेरिकी दशैं यस्तै कुटिया भित्र दङ्ग छ
यही सुन्दरताले नै मान्छे भित्र उमङ्ग छ
उठाउ देशको झण्डा बनाउँ स्वच्छ भावना
दशैं तिहारको रन्को सुनौलो शुभकामना ।
टङ्क प्रसाद सुवेदी
हाल अमेरिका
