अपहरणमा परेका छोरासँग ३२ वर्षपछि पुनर्मिलन !

एक चिनियाँ दम्पतीले सन् १९८८ मा एउटा होटेलबाट अपहरणमा परेका आफ्ना छोरासँग ३२ वर्षपछि पुनर्मिलन गर्न पाएका छन् । बालकक्षाबाट घर फर्कने बेला उनका लागि बुबाले पानी लिन लाग्दा दुई वर्षीय माओ यीन अपहरणमा परेका थिए । उनका अभिभावकले उनलाई देशभरि खोजे र उनकी आमाले १००,००० भन्दा बढी पर्चा बाँडिन् ।

उनीहरूको पुनर्मिलन सोमवार प्रहरीको एउटा पत्रकार सम्मेलनका क्रममा भयो र अहिले ३४ वर्षका ती छोराले आमाबाबुसँग समय बिताउने योजना रहेको बताए । माओ यीन सन् १९८६ फेब्रुअरी २३ मा जन्मिएका थिए। साउथ चाइना मर्निङ् पोस्टसँगको अन्तर्वार्तामा उनकी आमाले उनलाई चलाख, सुन्दर र स्वस्थ बालक भनेकी थिइन् ।

सन् १९८८ अक्टोबर १७ मा बुबा माओ जेन्जीन्ङ्सँग बालकक्षाबाट घर आउँदै गर्दा उनले पानी मागे। उनीहरू पानीका लागि एउटा होटलको ढोकामा रोकिए र बुबाले पानी ल्याउँदासम्म माओ हराइसकेका थिए । परिवारले उनलाई शहरभरि खोज्यो तर भेट्न सकेन । आमा लीले जागिर छोडेर छोराको खोजी गर्न थालिन् र १० भन्दा बढी प्रान्तमा एक लाखभन्दा बढी पर्चाहरू बाँडिन् तर कुनै सफलता हात लागेन ।

त्यसपछिका वर्षहरूमा उनी थुप्रै टिभी कार्यक्रमहरूमा देखा परिन्। उनले ३०० वटा सूचनाका आधारमा छोरालाई खोजिन् तर पत्ता लगाउन सकिनन् । सन् २००७ मा लीले ’बेबी कम ब्याक होम’ नामक स्वयंसेवी संस्था खोलेर हराएका बालबालिका खोज्न सहयोग गर्न थालिन् । उनले २७ बालबालिकालाई अभिभावकसँग मिलन गराएको चीनको सञ्चारमाध्यमहरूले बताएका छन् ।

सञ्चारमाध्यमका अनुसार गएको एप्रिलमा प्रहरीले सिचुआन प्रान्तमा एउटा बालक ३२ वर्ष अगाडि धर्मपुत्र बनाइएको सूचना पायो । त्यो स्थान अपहरण भएको स्थानभन्दा झण्डै एक हजार किलोमिटरको दूरीमा छ । प्रहरीले धर्मपुत्र बनाइएका एकजना ३४ वर्षीय मानिसको डीएनए परीक्षण गर्यो जुन माओ जेन्जीन्ङ र ली जीन्झीसँग मेल खायो ।

नाम फेरेर गू निङ्निङ राखिएका माओ यीनले घर सजावटको व्यवसाय गर्छन् र उनले आफ्नो भविष्यमा के गर्ने भन्ने बारेमा अहिल्यै थाहा नभएको बताए । प्रहरीका अनुसार उनलाई अपहरणकारीले एक बालबच्चाविहीन दम्पतीलाई छ हजार युआनमा बेचेका थिए । लीलाई चीनको मातृ दिवसको दिन मे १० मा छोरा भेटिएको कुरा सुनाइयो। “त्यो मैले पाएको सबैभन्दा उत्कृष्ट उपहार थियो,“ लीले भनिन् ।

अपहरणबारे अनुसन्धान भने कायम छ । दशकौँदेखि चीनमा बालबालिकाको अपहरण र बेचबिखन समस्याको रूपमा रहेको छ । आधिकारिक तथ्याङ्क नभएपनि ’बेबी कम ब्याक होम’ को वेबसाइटमा छोराको खोजी गर्न १४,८९३ अनुरोध र छोरीको खोजी गर्न ७,४११ अनुरोध राखिएका छन् । सन् २०१५ मा चीनमा बर्से्नि २०,००० बालबालिका अपहरणमा पर्ने आकलन गरिएको थियो ।

सन् २००९ मा चीन सरकारले स्थापना गरेको डीएनए तथ्याङ्कको आधारमा अहिलेसम्म ६,००० भन्दा बढी बालबालिका भेटिइसकेका छन् । र सन् २०१६ को मेमा सुरु गरिएको पुनर्मिलन परियोजना अन्तर्गत सन् २०१९ को जुनसम्म ४,००० भन्दा बढी हराइरहेका बालबालिका भेटिएका थिए । बीबीसीबाट