ह्वावेईका उपकरण हटाउने वेलायतको निर्णय निराशाजनक र गलत भएको चीनको भनाइ
वेलायतले मोबाइल फोन सेवा प्रदायकलाई प्रयोगमा रहेका ह्वावेईका सबै फाइभजी उपकरण सन् २०२७ सम्म हटाउन भनेपछि चिनियाँ राजदूतले त्यसलाई ’निराशाजनक र गलत’ भनेका छन् । अमेरिकाले ह्वावेईको उपकरणले राष्ट्रिय सुरक्षामा जोखिममा पार्ने बताउँदै प्रतिबन्ध लगाएको छ । तर ह्वावेईले पटक पटक कुनै देशलाई हानि नगर्ने बताउँदै आएको छ ।
अमेरिकी राष्ट्रपति डोनल्ड ट्रम्पले वेलायतको निर्णयको स्वागत गर्दै ह्वावेई ’असुरक्षित’ भएको बताएका छन् । वेलायतका लागि चिनियाँ राजदूतले ट्वीट गर्दै वेलायतले विदेशी कम्पनीलाई निष्पक्ष व्यवसाय वातावरण दिनसक्ने विषयमा प्रश्न गरेका छन् ।
वेलायतका डिजिटल मामिला मन्त्री ओलीभर डाउडेनले संसद्को दुईमध्ये तल्लो सदन हाउस अफ कमन्सलाई निर्णयको जानकारी गराएका थिए । डाउडेनका अनुसार पछिल्लो कदमका कारण वेलायतमा फाइभजी प्रविधिको प्रयोग एक वर्ष ढिला हुनेछ ।
नयाँ प्रतिबन्ध कम्पनीको ब्रोडब्यान्ड उपकरणको प्रयोगमा पनि लागु गरिएको छ । सेवा प्रदायकले पूर्णरूपमा फाइबर नेटवर्कमा प्रयोगका लागि ह्वावेईका नयाँ उपकरण खरिद नगरून् भन्ने वेलायत सरकारले चाहेको छ ।
गत वर्ष जनवरी महिनामा वेलायतले आफ्नो टेलिकम पूर्वाधारमा ह्वावेईको भूमिकाबारे समीक्षा गरेको थियो र त्यस बेला उक्त कम्पनीलाई वितरकका रूपमा कायम रहन दिने तर बजार हिस्सा भने नियन्त्रण गरिने निर्णय गरिएको थियो ।
