सरकारले भारतसँग सुपुदर्गी सन्धीको तयारी गर्दैछः झलनाथ खनाल

काठमाडौं । पूर्वप्रधानमन्त्री झलनाथ खनालले नेपाल र भारतबीच सुपुदर्गी सन्धी हुने तयारीमा रहेको बताएका छन् । शनिबार पुष्पलाल जन्मशताब्दी तथा ४७ औँ स्मृति दिवसका सन्दर्भमा आयोजित कार्यक्रममा पूर्वप्रधानमन्त्री खनालले यो सन्धी हुँदा भारत र चीनसँग सन्तुलन मिलाउन नसके त्यसले नेपालको राष्ट्रियतामाथि हमला हुने बताएका हुन् । उनले यसमा सन्तुलन मिलाउन नसके राष्ट्रियतामाथि अर्को हमला हुने बताए ।

उनले भने, ‘अहिले मैले सुनिरहेको छु, नेपाल र भारतबीच सुपुदर्गी सन्धी हुँदैछ । त्यो सन्धी हुँदा नेपालले भारत र चीनसँग सन्तुलन मिलाएर गर्न सकेन भने नेपालको राष्ट्रियतामाथि अर्को हमला हुनेवाला छ ।’

खनालले भावनाले मात्रैले कम्युनिष्ट एकता नहुने उल्लेख गर्दै एकताका लागि सही विचार र नीति आवश्यक रहेको बताए । उनले भने, ‘अबको लक्ष्य वैज्ञानिक समाजवाद हुनुपर्छ, वैचारिक, राजनीतिक, साङ्गठनिक पुनःगठन आवश्यक छ, बलियो कम्युनिष्ट पार्टीले मात्रै मुलुकको आर्थिक सामाजिक रुपान्तरण गर्न सक्छु ।’