भिजिट भिसा प्रकरणको अनुसन्धान गृहमन्त्रीसम्म पुग्यो भने मात्र पद छाड्नुपर्छः महामन्त्री शर्मा
काठमाडौं । नेपाली कांग्रेसका महामन्त्री विश्वप्रकाश शर्माले अहिले गृहमन्त्रीमाथि कुनै उजुरी नै नपरेकाले राजीनामा दिनुनपर्ने बताएका छन् ।
मंगलबार संसद भवन परिसरमा पत्रकारहरुसँग कुरा गर्दै महामन्त्री शर्माले अहिले कर्मचारीमाथि अनुसन्धान भइरहेको तर अनुसन्धान गृहमन्त्रीसम्म पुग्यो भने मात्र पद छाड्नुपर्ने बताएका हुन् ।
उनले भने, ‘यो अत्यन्तै गम्भीर घटना बाहिर आएको छ । यो लामो समयदेखि भइरहेको कुरा आएको छ । अहिले यो अनुसन्धान अख्तियारले गरिरहेको छ । कर्मचारीमाथि अनुसन्धान भइरहेको छ । यसमा अनुसन्धान गर्दा कर्मचारी, मन्त्री, नेता, कोही पनि हुनुहुन्छ भने गहन अनुसन्धान गरेर जानुपर्छ । अनुसन्धान गर्दैगर्दा अख्तियारले यदि मन्त्रीउपर पनि अनुसन्धान भइरहेको छ भने मन्त्रीले राजीनामा दिनुपर्छ । अख्तियारले मन्त्रालयसँग आवद्ध कर्मचारीमाथि अनुसन्धान भइरहेकाले अनुसन्धान त्यहीँ केन्द्रित गर्नुपर्छ । तर अनुसन्धानको लहरो गृहमन्त्रीसम्म पुगेमा मात्र राजीनामा गर्नुपर्छ ।’
महामन्त्री शर्माले अहिले अघिल्लो गृहमन्त्रीको प्रकरणलाई जोडेर यो प्रकरणलाई हेर्न नहुने बताए ।
