भारतका रक्षामन्त्री राजनाथ सिंहसँग बाबुरामको अर्थपूर्ण भेट
काठमाडौं । पूर्वप्रधानमन्त्री डा. बाबुराम भट्टराई र भारतका रक्षामन्त्री राजनाथ सिंहबीच भेटवार्ता भएको छ । भारत भ्रमणमा रहेका भट्टराई र रक्षामन्त्री सिंहबीच सोमबार भेटवार्ता भएको हो ।
भेटमा नेपाल–भारत सम्बन्ध सुदृढ गर्दै विकास र आर्थिक सहकार्यलाई नयाँ उचाइमा लैजाने विषयमा सकारात्मक संवाद भएको भट्टराईको निजी सचिवालयले जनाएको छ ।
भेटमा भट्टराईले हालै पेहलगाम, कश्मीरमा सर्वसाधारणमाथि भएको आतंकवादी हमलाको घोर निन्दा गर्दै गहिरो दुःख व्यक्त गरेका थिए । डा. भट्टराई प्रगतिशील नेपाली समाज समिति, भारतको अधिवेशन उद्घाटनको निम्ति भारत भ्रमणमा छन् ।
