कांग्रेस नबाहिरिएसम्म सरकार ढल्दैनः प्रमुख सचेतक घिमिरे
काठमाडौं । नेपाली कांग्रेसका प्रमुख सचेतक श्याम घिमिरेले अहिले देशमा अशान्ति मच्चाउने तत्वहरुले सरकारप्रति गलत किसिमको भाष्य निर्माण गरिरहेको बताएका छन् ।
प्रतिनिधिसभाको शुक्रबारको बैठकमा घिमिरेले दैनिक सरकार परिवर्तनको हल्ला चलाइरहेका र मुलुकमा अस्थिरता सिर्जना गर्ने प्रयत्न गरिरहेको बताएका हुन् ।
उनले भने, ‘अहिले देशमा अशान्ति मच्चाउने तत्वहरुले एक किसिमको भाष्य निर्माण गर्दैछ । दैनिक सरकार परिवर्तनको हल्ला चलाइरहेका छन् । मुलुकमा अस्थिरता सिर्जना गर्ने प्रयत्न हुँदैछ । विभिन्न वादीका नाममा देशमा अशान्ति मच्चाइ धमिलो पानीमा माछा मार्ने प्रयत्न पनि विभिन्न कोणबाट भइरहेको देखिन्छ । ’
उनले संसदको भूमिका परिवर्तन नआएको हुँदा सांसदप्रति जनताको धारणा केन्द्रित हुन नसकेको बताए ।
घिमिरेले सरकारले काम गर्ने शैली बदल्नुपर्ने बताए ।
उनले भने, ‘सरकारले गति बढाउनुपर्छ, सुशासनको मामिलामा आक्रामक ढंगले अघि बढ्नुपर्छ । नेपाली जनताले नेपाली कांग्रेस र एमालेजस्ता ठूला पार्टीको बलियो र शक्तिशाली सरकार हो भन्ने कुरा व्यवहारमा महसुस गर्न पाउनुपर्छ । यस हिसाबले अघि बढ्न नेपाली कांग्रेस संसदीय दल सरकारसँग आग्रह गर्दछ ।’
उनले कांग्रेस सरकारबाट नबाहिरिएसम्म सरकार ढल्दैन भन्ने सबैलाई थाहा भएको र एमालेसँग भएको सहमति अक्षरशः पालना गर्न कांग्रेस प्रतिबद्ध रहेको बताए । उनले सरकार गठनका लागि कुनै पनि दलले संविधानअनुसार गठबन्धन गर्नैपर्ने अवस्था रहेको बताए ।
उनले भने, ‘दैनिकरूपमा सरकार ढल्ने हल्लाको पछाडि नलागी आफ्नो काम तदारुकताका साथ देखाउनसमेत आग्रह गर्दछु । वर्तमान संविधान अनुसार एउटा दलको बहुमत आउने र एकलौटी सरकार बन्न नसक्ने अवस्था आजको दिनमा कम छ । यस्तो अवस्थामा हामीले गठबन्धनको संस्कृति निर्माण गर्नुपर्छ ।’
