सत्ता गठबन्धनमा कुनै खटपट नरहेको देउवाको दाबी
काठमाडौं । नेपाली कांग्रेस सभापति शेरबहादुर देउवाले सत्ता समीकरणमा फेरबदल नहुने बताएका छन् ।
थाइल्याण्ड भ्रमण सकेर शुक्रबार स्वदेश फर्केका सभापति देउवाले त्रिभुवन विमानस्थलमा पत्रकारहरुसँग कुरा गर्दै सभापति देउवाले सत्ता परिवर्तनको कुनै संभावना नरहेको बताएका हुन् । उनले सत्ता गठबन्धनमा कुनै खटपट नरहेको पनि दाबी गरे ।
उनले भने, ‘सत्तासमीकरण परिवर्तन हुने कुरामा सत्यता छैन ।’ वैशाख ७ गते देउवा परिवार थाइल्याण्ड गएका थिए ।
सभापति देउवा थाइल्याण्ड गएका बेला नेपालमा सत्ता फेरबदलका समाचार सार्वजनिक भएका थिए । कांग्रेस महामन्त्री गगन थापाले यही तरिकाले सरकारले काम गरे कांग्रेसले सरकार छाड्ने बताएका थिए ।
त्यस्तै माओवादी अध्यक्ष प्रचण्डले पार्टी संसदीय दलको बैठकमा सत्ता फेरबदलको संकेत गरेका थिए । प्रचण्डले देउवा थाइल्याण्डबाट फर्केपछि यसबारेमा कुराकानी गर्ने बताएका थिए ।
त्यस्तै प्रधानमन्त्री केपी शर्मा ओलीले बिहीबार आयोजित एक कार्यक्रममा पार्टीका नेता कार्यकर्तालाई सत्ताको चिन्ता नगर्न र ८४ को चुनावमा केन्द्रित हुन निर्देशन दिएका थिए । यसबाट पनि सत्तागठबन्धनमा खटपट आएको विश्लेषण नेपाली राजनीतिमा हुन थालेका छन् ।
