यो सरकारले अब एक दिनपनि नेतृत्वमा बस्ने औचित्य गुमाइसकेको छः प्रचण्ड
काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अहिलेको सरकारले अब एक दिनपनि नेतृत्वमा बस्ने औचित्य गुमाएको बताएका छन् ।
नेपाल कम्युनिष्ट पार्टीको ७७औँ स्थापना दिवस तथा १५६ औँ लेनिन जयन्तीको अवसरमा मंगलबार आयोजित कार्यक्रमा प्रचण्डले केपी ओली नेतृत्वको सरकारको जन्म नै भ्रष्टाचारीको रक्षा गर्न भएको बताएका हुन् ।
उनले भने, ‘अहिले देशमा राजनीतिक जस्तो स्थिति बनेको छ । त्यस्तै चूनौतिपूर्ण स्थिति बनेको छ । अहिलेको सरकार खासगरी केपी ओली नेतृत्वको जो सरकार छ यसको जन्म नै अप्राकृतिक छ । अलोकतान्त्रिक छ, अपारदर्शी छ । हजारौं शिक्षक सडकमा छन् । ती शिक्षकको समस्या समाधान गर्न गम्भीर हुनुको सट्टा सरकार र त्यसको नेतृत्व गर्ने प्रधानमन्त्री शिक्षकलाई अपमानित गर्ने, गाली गर्ने काम कामबाहेक केही गरेको छैन ।’
उनले सरकारले शिक्षकहरुलाई अपमानित गर्ने काम छोडेर गम्भीररुपमा संवाद गर्न समेत सरकारलाई सुझाव दिए ।
प्रचण्डले शिक्षा ऐन जारी नहुँदासम्म आन्दोलनलाई निरन्तरता दिन शिक्षकहरूलाई आग्रह गरे । उनले भने, ‘शिक्षक साथीहरूलाई धैर्यतापूर्वक आन्दोलनलाई निरन्तरता दिन पनि अपिल गर्न चाहन्छु। तपाईंहरूले पटक पटक आन्दोलन गर्नुभएको, पटक–पटक सम्झौता गर्नुभएको छ र पटकपटक धोका भएको छ। यो पटक त्यो स्थिति हुन नदिने जिम्मेवारी हामी सबैको छ। शिक्षकहरूको अझै धेरै छ ।’
