कांग्रेस र एमालेका कैयौँ नेतासँग भएका संवादका आधारमा सरकारको आयुकाबारेमा बोलेको हुँः अध्यक्ष प्रचण्ड
बुटवल । नेकपा माओवादी केन्द्रका अध्यक्ष पुष्पकमल दाहाल प्रचण्डले नेपाली कांग्रेस र एमालेका कैयौँ नेतासँग भएका संवादका आधारमा यो सरकार लामो जाने स्थिति नरहेको बताएका छन् ।
प्रेस सेन्टर रुपन्देहीले बिहीबार भैरहवामा गरेको पत्रकार सम्मेलनमा अध्यक्ष प्रचण्डले आफूले हचुवाका भरमा सरकारकोबारेमा टिप्पणी नगरेको बताएका हुन् ।
उनले माओवादी केन्द्रलाई यो सरकार ढालेर अहिले सरकारमा आउने कुनै रुचि नभएको र आफूले कुण्ठापनि नपोखेको बताए । प्रचण्डले केही दिनअघि सरकार लामो नजाने बताएका थिए । प्रचण्डको भनाई नेकपा एमालेले सत्ताबाट हट्नुपर्दाको कुण्ठा भएको बताएको थियो ।
प्रचण्डले वर्तमान सरकार दुई तिहाइको नभई षड्यन्त्रको र अपारदर्शी सरकार भएको आरोप लगाए । उनले भने, ‘यो सरकारको जन्म नै संविधान कुल्चेर अप्राकृतिक ढंगले बनेको हो । यो सरकार भ्रष्टाचारी, बिचौलिया र दलाललाई बचाउन बनेको हो ।’
