आलोचना गर्दैमा कांग्रेसको कोही पनि भीम रावल बन्नु पर्दैनः गगन थापा
कलैया । नेपाली कांग्रेसका महामन्त्री गगन थापाले सरकारका कामको शैली परिवर्तन अपरिहार्य रहेको बताएका छन् । बुधबार बारा क्षेत्र नम्बर ३ को क्षेत्रीय सम्मेलनलाई सम्बोधन गर्दै महामन्त्री थापाले सरकारले काम नगरेका कारण नै असन्तुष्टि बढेको बताए ।
उनले अहिले नेपालमा बनेका प्रत्येक गठबन्धनका प्रधानमन्त्रीहरूले दिनमा एक पटक सरकार टिक्छ भन्नुपर्ने अवस्था रहेको बताए । महामन्त्री थापाले आठ दश वर्षको बीचमा बनेका सरकारका प्रधानमन्त्रीको हालत त्यस्तै भएको र यो क्रम जारी रहेको बताए ।
उनले भने, ‘हिजो बेलुकीसम्म नटिक्लाजस्तो थियो, आज बिहानदेखि टिक्ने भयो भनेर भन्नुपर्ने अवस्था छ । प्रत्येक गठबन्धनको हालत यस्तै हो ।’
उनले संविधान संशोधन नगर्दासम्म कुनै दलको बहुमत नआउने भएकाले त्यसको अन्त्यका लागि संविधान संशोधन अपरिहार्य रहेको बताए । उनले आफ्नो पार्टीमा फरक मत र आलोचना गर्न पाइने बताए ।
महामन्त्री थापाले आलोचना गर्दैमा कांग्रेसको कोही पनि भीम रावल बन्नु नपर्ने बताए । उनले भने, ‘ यो कांग्रेस हो । यो हाम्रो पार्टी हो, बा को पार्टी होइन । कांग्रेस पार्टीमा प्रश्न गर्न पाइन्छ ।’
