सत्तारुढ दलकै नेताबाट सरकारविरुद्ध आक्रोश बढेपछि देउवा र ओलीले गरे छलफल
काठमाडौं । प्रधानमन्त्री केपी शर्मा ओली र कांग्रेस सभापति शेरबहादुर देउवाबीच भेटवार्ता भएको छ ।
सरकारको काम कारबाहीलाई लिएर कांग्रेसका नेताहरुले प्रश्न उठाउन थालेपछि दुई नेताबीच मंगलबार भेटवार्ता भएको हो ।
दुई नेताबीच प्रधानमन्त्री निवास बालुवाटारमा मंगलबार एक घण्टा वार्ता भएको हो । दुई नेताबीच सरकारको कामका विषयमा छलफल भएको बताइएको छ । केही दिनअघि माओवादी अध्यक्ष प्रचण्डले सरकार परिवर्तन हुने बताएका थिए ।
त्यस्तै कांग्रेस महामन्त्री गगन थापा र विश्वप्रकाश शर्माले सरकारको कार्यशैलीलाई लिएर आलोचना गरिरहेका छन् । कांग्रेस महामन्त्री थापाले त सरकारको गति ट्याक्टरको गतिमा भएको भन्दै असन्तुष्टि जनाएका छन् । उनले विचौलियाहरु प्रधानमन्त्रीको बेडरुमसम्म पुग्ने गरेको बताएका छन् ।
अर्का महामन्त्री शर्माले सरकारका प्राथामिकता छोडेर प्रधानमन्त्री सडकतिर व्यस्त हुनु उचित नभएको बताउँदै आएका छन् ।
शनिबार नेपालगंजमा आयोजित कार्यक्रममा शमाले भनेका थिए, ‘प्रधानमन्त्रीले सडकको प्रदर्शनमा होइन, सरकारको प्रदर्शनमा ध्यानकेन्द्रित गर्न जरुरी छ । आज दिनभर प्रधानमन्त्रीज्यूको समय शिक्षक आन्दोलनको हल खोज्न केन्द्रित हुनुपथ्र्यो । तर, प्रधानमन्त्रीज्यू त्यतातिर होइन सडकतिर लाग्नु भो ।’
त्यस्तै कांग्रेस नेता डा. शेखर कोइरालाले पनि सरकारले सुशासन नदिएको भन्दै सरकारको आलोचना गर्दै आएका छन् । दुई नेताबीचको भेटमा यिनी असन्तुष्टिकाबारेमा कुराकानी भएको बताइएको छ ।
