कारागारबाट रविको सन्देशः न्यायको मन्दिरबाट अन्याय नहुनेमा विश्वस्त छु
काठमाडौं । राष्ट्रिय स्वतन्त्र पार्टीका सभापति रवि लामिछानेले कारागारबाट आफ्ना शुभचिन्तक तथा पार्टीका नेता कार्यकर्तालाई चार सन्देश पठाएका छन् ।
बुटवलको सुप्रिम सहकारी ठगी मुद्दामा सोमबार भैरहवा कारागार चलान भएका सभापति लामिछानेले पार्टीका नेताहरुसँग आफ्ना चार सन्देश पठाएका हुन् । लामिछानेका प्रेस सल्लाहकारसमेत रहेका रास्वपाका नेता प्रमोद न्यौपानेले उनीसँगको भेटपछि चार सन्देश सुनाएका हुन् ।
न्यौपानेका अनुसार लामिछानेले अदालतको आदेश सम्मान गर्ने बताएका छन् । त्यस्तै उनले कानुनले दिएको अधिकार प्रयोग गर्दै सर्वोच्चमा जाने उल्लेख गरेका छन् । त्यसैगरी लामिछानेले न्यायको मन्दिरबाट आफूप्रति अन्याय नहुनेमा आफू विश्वस्त रहेको बताएका छन् ।
उनले अहिले आफूमाथि व्यक्त गरिएका शंका पनि गलत सावित हुने जिकिर गरेका छन् । लामिछानेको भनाई उदृत गर्दै न्यौपानेले भनेका छन्,‘अहिले ममाथि राजनीतिक प्रतिशोध भयो । पालो सबैको आउँछ । यो परीक्षाको पहिलो विद्यार्थी म भएँ । मैले जसरी नै जाँच अरूले पनि दिनुपर्ने छ ।’
लामिछानेले पार्टीका नेताहरुलाई पार्टीलाई एकढिक्का राखेर अभियान निरन्तर राख्न, अहिलेको अवस्थाबाट पार्टीलाई बढाउन र नसकेपनि घटाउने काम चाहिँ नगर्न आग्रह गरेका छन् ।
