शिक्षकहरुप्रति सरकारको घोर अपहेलना !
काठमाडौं । नेकपा माओवादी केन्द्रका महासचिव देव गुरुङले आन्दोलनरत शिक्षकहरुसँग वार्ता गरी समाधान खोज्न सरकारलाई आग्रह गरेका छन् ।
आइतबार सामाजिक संजालमार्फत महासचिव गुरुङले शिक्षकहरुले आफ्ना मागकाबारेमा अग्रिम जानकारी गराएपनि हतारहतार संसद अधिवेशन अन्त्य गरेर सरकारले अपमान गरेको बताएका हुन् ।
उनले भनेका छन्, ‘शिक्षकहरु प्रति सदनबाट शिक्षा विधेयक शिघ्रतर रुपमा पारित गरियोस् भनि शिक्षकहरुले गत चैत्र २० गतेदेखि सडक आन्दोलनमा उत्रेको देखिन्छ । उक्त विधेयक शिघ्रतर रुपमा पास नभएमा चैत्र २० गतेबाट सडक आन्दोलन उत्रने भनि सरकारलाई अग्रिम जानकारी पनि शिक्षकहरुले गरेको देखिन्छ । तर सरकारले चैत्र १९ गते मध्यरातबाट हिउदे विद्येयक अधिवेशन समापन गरेको छ । शिक्षा विधेयक शिक्षा समितिको उपसमितिमा दफा छलफलमा रहेको देखिन्छ। समितिबाट पारित गरियो नै भने पनि सदन नचलेको स्थितिमा फुल हाउसबाट पारित हुन सक्ने भएन । यस्तो स्थितिमा विधेयक र सदनको स्थितिबारे शिक्षकहरुसँग वार्ता–संवाद केही नगरी सदनको समापना गर्नु सरकारको शिक्षकहरुप्रतिको उपेक्षा, अपहेना र सरकारको निरंकुश चरित्रको पराकाष्टता हो।’
उनले आन्दोलनरत शिक्षकसँग वार्ता गरी विधेयक पारित गर्ने प्रतिवद्धता जनाउन समेत आग्रह गरेका छन्।
उनले भनेका छन्, ‘सरकारको यस प्रकारको गैरजिम्मेवार व्यवहारले गर्दा देशभरका विद्यालयहरुको पठनपाठन ठप्प छ। अतः सरकारले आन्दोलनरत शिक्षकहरुसँग अविलम्व वार्ता गरी सदनमा विचाराधीन विद्येयकबारे कहिलेसम्म सदन बोलाएर पारित गर्ने भनि एउटा प्रतिवद्वता जाहेर गर्नैपर्छ।’
सरकारलाई दवाव दिन नेपाल शिक्षक महासंघले सोमबारदेखि देशव्यापी शैक्षिक हड्ताल घोषणा गरिसकेको छ ।
