माधव नेपाल भन्छन्-अब वंशको शासनतिर फर्किने सम्भावना छैन
विराटनगर । नेकपा (एकीकृत समाजवादी)का अध्यक्ष माधवकुमार नेपालले राजतन्त्र पुनःस्र्थापनाको सम्भावना नरहेको बताएएका छन् ।
मंगलबार विराटनगर विमानस्थलमा पत्रकारहरुसँग कुरा गर्दै अध्यक्ष नेपालले अब वंशको शासनतिर फर्किने सम्भावना नरहेको बताएका हुन् ।
उनले अब शासन गर्न जनताको मन जितेर र जनताबाट निर्वाचित भएर आउनुपर्ने बताए । उनले भने, ‘जनताको मनको शासनलाई मन नमान्ने । जनताको चेतनामा विश्वास नगर्ने । अनि वंशको शासन खोज्ने ? त्यसो भए जाउँन त राणाशासनमा । राणाशासनभन्दा अझै पुरानो खोजौं । पूँजीवादी युगमा पनि बस्ने होइन । अब समाजवादी युगमा जाने हो ।’
अध्यक्ष नेपालले राजावादीको आन्दोलन बेतुतक र बेमौसमको भएको बताए । अध्यक्ष नेपालले पूर्वराजासँग पाँच बुँदे सम्झौता नभएको बताए । उनले त्यतिबेला पूर्वराज सम्पूर्ण अधिकार जनतालाई सुम्पन तयार भएको र त्यही अनुसार वक्तव्य आएको बताए ।
उनले भने, ‘त्यतिबेला पूर्वराजासँग पाँच बुँदे सम्झौता भएको थिएन । जनताको जे निर्णय हुन्छ त्यो मान्न म तयार छु भनेका हुन् ।’
