पूर्वराजाले शाही निशान प्रयोग गरेको भन्दै कारबाही गर्न कांग्रेस सांसद खतिवडाको माग
काठमाडौं । नेपाली कांग्रेसले पूर्वराजा ज्ञानेन्द्र शाहले श्री ५ महाराजधिराज र शाही निशान प्रयोग गरेको भन्दै आपत्ति जनाएको छ ।
बिहीबारको प्रतिनिधिसभा बैठकमा नेपाली कांग्रेस सांसद रामहरि खतिवडाले पूर्वराजाले संविधान मिच्न खोजेको भन्दै उनका क्रियाकलाप बन्द गर्न सरकारसँग माग गरे ।
उनले शाही निशाना २०६५ साल जेठ १७ गते हटाएर त्यहाँ राष्ट्रिय झण्डा राखिएको बताए । उनले भने, ‘पूर्वराजा ज्ञानेन्द्र शाहले फागुन ६ गते भिडियो सन्देशमा श्रीपाँच महाराजधिराज उल्लेख गरेको र शाही निशाना प्रयोग गरिएको देखियो। यो शाही निशाना २०६५ साल जेठ १७ गते हटाइएर त्यहाँ राष्ट्रिय झण्डा राखिएको थियो। नेपालको संविधानमा श्री ५ महाराजधिराज उल्लेख छैन । यस्तो सन्देश श्री ५ महाराजधिराज र शाही निशान राख्नेप्रति घोर आपत्ति छ ।’
उनले यस्ता क्रियाकलाप तत्काल बन्द गर्न पूर्वराजालाई सुझाव समेत दिए ।
