सबै नेताको सम्पत्ति छानबिन गर्न रास्वपा सांसद ढकालको माग
काठमाडौं । राष्ट्रिय स्वतन्त्र पार्टीका सांसद हरि ढकालले अमेरिकी राष्ट्रपति डोनाल्ड ट्रम्पले नेपाललाई लिएर दिएको अभिव्यक्तिमाथि प्रधानमन्त्रीले कुनै प्रतिक्रिया नदिएको भन्दै आपत्ति जनाएका छन् ।
मंगलबारको प्रतिनिधिसभा बैठकमा उनले भ्रष्टाचारको विरुद्ध बोल्दा युवाहरुलाई समात्ने भन्दै कटाक्ष गरे । उनले भने, ‘डोनाल्ड ट्रम्पले यो देशलाई फ्रड भनेको मैले मात्र सुनेको कि प्रधानमन्त्रीज्यूले पनि सुन्नु भएको छ । छैन त प्रतिक्रिया ?’
उनले प्रधानमन्त्रीले ‘म भ्रष्टाचार गर्दिनँ र गर्न दिन्नँ’ भन्ने खालको अभिव्यक्ति दिने गरेको भन्दै यस्तो अभिव्यक्ति नसुहाउने पनि बताए ।
उनले भने, ‘सम्मानीय प्रधानमन्त्री ज्यू सार्वजनिक कार्यक्रममा म भ्रष्टाचार गर्दिनँ गर्न दिन्नँ भन्नु हुन्छ । म यहाँ केही तथ्यांंक प्रस्तुत गर्छु भ्रष्टाचार अवधारणा सुचांक २०२३ सार्वजनिक गरेको छ ट्रान्स्परेन्सी इन्टरनेशनलले, त्यसका १८० देशहरुको तथ्यांंक छन् । यो वर्षमा, यो सरकार सञ्चालक को थियो सभामुख महोदय भ्रष्टाचार गर्दिनँ गर्न नि दिन्न भन्नुभएको रहेछ त । भ्रष्ट्राचार गर्दिनँ गर्न नि दिन्न भन्न सुहाउँदैन ।’
उनले २०४७ सालपछिका दलका नेतालाई अनुसन्धानको दायरामा ल्याउन माग गर्दै छानबिन गर्ने हो भने कसैले पनि टाउको लुकाउने ठाउँ नभेटिने बताए ।
