जसपा नेपाल अनिर्णित हुँदा अध्यादेश राष्ट्रियसभामा पेश गर्ने निर्णयबाट पछि हट्यो सरकार
काठमाडौं । सरकारले ल्याएका ६ वटा अध्यादेश आज सदनमा निर्णयार्थ पेस नहुने भएका छन् । जनता समाजवादी पार्टी नेपालले निर्णय नदिएपछि सरकार अध्यादेश निर्णयार्थ पेस गर्ने निर्णयबाट पछि हटेको हो ।
बिहीबार बसेको कार्यव्यवस्था तथा परामर्श समितिको बैठकमा सरकाले अध्यादेशलाई लिएर सहमति जुटाउने प्रयास भइरहेको बताएको छ । बैठकमा सरकारले अझै सहमतिको पहल भइरहेकाले अध्यादेशसम्बन्धी प्रस्तावलाई कार्यसूचीमा नराख्न आग्रह गरेको थियो ।
कानुनमन्त्री अजय चौरसियाले सभामुख देवराज घिमिरे र राष्ट्रिय सभा अध्यक्ष नारायणप्रसाद दाहाललाई भेटेर अध्यादेश निर्णयार्थ पेस गर्ने कार्यसूची बिहीबारका लागि नराख्न आग्रह गरेका छन् ।
त्यसपछि आजको बैठकमा अध्यादेश पेश नगर्ने गरी अन्तिम कार्यसूची तयार गरिएको हो । ती अध्यादेश अस्वीकृत गर्न प्रतिनिधिसभामा प्रतिपक्षी दलका सांसदहरूले ५० र राष्ट्रिय सभामा १६ वटा अस्वीकृत प्रस्ताव दर्ता गरेका थिए ।
