सांसद पद निलम्बन फुकुवाका लागि सभामुखलाई रविको आग्रह
काठमाडौं । राष्ट्रिय स्वतन्त्र पार्टीका सभापति रवि लामिछानेले सभामुख देवराज घिमिरेलाई भेटेका छन् । शुक्रबार सिंहदरबारस्थित सभामुख घिमिरेको कार्यकक्षमा सभामुखलाई भेटेर सभापति लामिछानेले सांसद पद निलम्बन फुकुवाका लागि निवेदन दिएका हुन् । संसदको हिउँदे अधिवेशन आजदेखि सुरु हुँदै छ ।
यसअघि लामिछानेले संसदीय दलको कार्यालयमा पुगेर रास्वपाका सांसदहरूसँग भेट गरेका थिए । सहकारीको रकम अपचलनको आरोपमा पक्राउ परेपछि संसद सचिवालयले लामिछानेलाई गत ८ पुसमा सांसद पदबाट निलम्बन गरेको थियो ।
लामिछानेलाई पोखरास्थित सूर्यदर्शन सहकारी संस्थाको बचत अपचलन तथा सम्पत्ति शुद्धीकरणको कसुरमा पनि मुद्दा चलेसँगै उनी सांसद पदबाट निलम्बित भएका थिए ।
सहकारी ठगी, संगठित अपराधसहित सम्पत्ति शुद्धीकरण मुद्दा लागेका रविलाई कास्की जिल्ला अदालतका न्यायाधीश नीतिज राईले गत पुस २५ गते ६५ लाख रुपैयाँ धरौटीमा छाड्न आदेश दिएका थिए । त्यस्तै उनी जिल्ला अदालत काठमाडौंबाट र रुपन्देहीबाट समेत धरौटीमा छुटेका छन् ।
