शंकर पोखरेलको प्रश्नः ३२ सीट भएको माओवादी सत्तामा हुँदा चाहिँ प्राकृतिक, जनताले रोजेका पार्टीले नेतृत्व गर्दा अप्राकृतिक ?
काठमाडौं । नेकपा एमालेका महासचिव शंकर पोखरेलले मुलुकलाई निराशाको खाडलबाट बाहिर निकाल्ने प्रयत्न गरिरहँदा राम्रो भएको देख्न नचाहनेहरुले सरकारको आलोचना गरेको आरोप लगाएका छन् ।
राष्ट्रिय युवा संघको राष्ट्रिय कार्यकर्ता भेलालाई शनिबार काठमाडौंमा सम्बोधन गर्दै महासचिव पोखरेलले केपी ओलीले सरकार चलाएर राम्रो काम गरिरहेको समयमा राम्रो भएको देख्न नचाहनेहरुले सरकारको आलोचना गरेको आरोप लगाएका हुन् ।
उनले देशलाई अस्थिरताको दलदलमा फसाइरहन चाहने प्रवृत्तिका व्यक्तिहरु एमाले र त्यसको नेतृत्व विरुद्ध चौतर्फी घेराबन्दी गरी आक्रमण गरिरहेका बताए ।
उनले भने, ‘मुलुकलाई आर्थिक संकटबाट बाहिर निकाल्ने जमर्को भइरहेको छ र नेपालका उद्योगी व्यवसायीहरु अब नेपालमा नै केही हुन्छ की भनेर आशा प्रकट गरिरहेको अवस्था छ । तर यस्तोबेलामा नेपाललाई अस्थिरताको दलदलमा फसाइरहन चाहने प्रवृत्तिका व्यक्तिहरु फेरि एकपटक एमाले र त्यसको नेतृत्वविरुद्ध चौतर्फी घेराबन्दी एवम आक्रमण गरिरहेका छन् ।’
महासचिव पोखरेलले एमालेको नेतृत्वमा सरकारले जनतामा आशा जगाएको दाबी गरे । उनले दुई ठूला पार्टीको मिलन अप्राकृतिक भए जनताले अस्वीकार गरेकाहरुले शासन गर्ने कुरा प्राकृतिक हुन्छ भन्दै प्रश्न गरे ।
उनले भने, ‘२७५ सीट भएको संसदमा ३२ सीट भएको माओवादी सत्तामा हुँदा चाहिँ प्राकृतिक हुने, जनताले रोजेका पार्टीहरुले सरकारको नेतृत्व गर्दा चाहिँ अप्राकृतिक हुन्छ ? आज प्रचण्ड सत्ता गुमाएको छटपटीबाट विचलित भएका छन् ।’
