राप्रपाले केन्द्रीय कार्यसमिति बैठकमार्फत सरकारको कामको समीक्षा गर्दै
काठमाडौं । राष्ट्रिय प्रजातन्त्र पार्टीको केन्द्रीय कार्य समितिको बैठक सुरु भएको छ । धुम्बाराहीस्थित एसआर बैङ्क्वेटमा शुक्रबारदेखि बैठक सुरु भएको हो ।
बैठकमा अध्यक्ष राजेन्द्र लिङ्देनले समसामयिक राजनीतिक परिस्थितिको समीक्षा र भावी कार्यदिशा सम्बन्धि राजनीतिक प्रतिवेदन प्रस्तुत गरेका छन् ।
त्यस्तै महामन्त्री एवं सचिवालय प्रमुख राजेन्द्र गुरुङले सचिवालयको प्रतिवेदन पेश गरेका छन् । बैठकअघि अध्यक्ष राजेन्द्र लिङ्देनले बैठकमा समसामयिक राजनीतिकबारे छलफल हुने जानकारी दिए । साथै, पार्टीका आगामी रणनीति, प्रतिपक्षको भूमिका र प्रतिपक्ष दलहरूसँगको सहकार्य लगायतका विषयमा छलफल गरिने अध्यक्ष लिङ्देनले बताए ।
उनले ठूला दुई दल मिलेर बनेको सरकारले अहिलेसम्म के–के गरेको छ त्यसको बारेमा समेत समीक्षा गरिने बताए । त्यस्तै बैठकमा मंहगी, निर्माण सामग्रीको मूल्य वृद्धिलगायतका विषयमा छलफल हुने उनले बताए । बैठक शनिबारसम्म चल्नेछ ।
