इजरायल–हमास युद्धविराम आजदेखि सुरु हुँदै, यसरी छुट्नेछन् बन्धकहरु
बीबीसी । इजरायलले हमाससँगको युद्धविराम सम्झौताअन्तर्गत आज मुक्त हुने पहिला तीन बन्धकहरू प्राप्त गर्ने तयारी गरिरहेको छ ।
शुक्रबार राति अबेरसम्मको छलफलपछि इजरायली मन्त्रिपरिषद्ले अन्तिम स्वीकृति दिएको उक्त सम्झौता कार्यान्वयन स्थानीय समयअनुसार आइतबार बिहान ८ः३० बजेबाट सुरु हुनेछ ।
अर्को ६ सातासम्ममा हमासको कब्जामा रहेका तीन–तीन बन्धकहरूको सट्टामा एक हजार भन्दा बढी प्यालेस्टिनी बन्दीहरूलाई इजरायलले छाड्ने तयारी गरेको छ ।
युद्धविराम लागु हुने समय नजिकिँदै जाँदा आफ्नो घरबाट विस्थापित भएर अस्थायी शिविरमा बसिरहेका प्यालेस्टिनीले आफूहरूमा घर फर्कने आशा जागेको बताएका छन् ।
इजरायली मन्त्रिपरिषद्ले हमाससँग भएको युद्धविराम र बन्धक रिहाइसम्बन्धी सम्झौता अनुमोदन गरेसँगै आइतबारबाट त्यो कार्यान्वयनमा आउने बाटो खुलेको थियो ।
इजरायली डिफेन्स फोर्सस (आईडीएफ)ले आइतबार बिहान ८ः३० बजेबाट युद्धविराम कार्यान्वयनमा आउने पुष्टि गरेको छ । सम्झौताअनुसार युद्धविरामको पहिलो दिन तीनजना बन्धकहरूलाई हमासले रिहा गर्ने अपेक्षा गरिएको इजरायलले जनाएको छ ।
हमासनिकट एक स्रोतले एएफपी समाचार संस्थालाई बताए अनुसार सुरुमा छुट्ने ती मानिसहरू महिला हुनेछन् । कतार, अमेरिका र इजिप्टले मध्यस्थता गरेको यस सम्झौता अनुसार पहिलो चरण झण्डै छ साता लामो हुनेछ ।
त्यसक्रममा १५ महिनादेखि हमासको नियन्त्रणमा रहेका ३३ जना इजरायली बन्धकहरू चरणबद्ध रूपमा छुट्नेछन्। जसमा धेरैजसो महिला, बालबालिका र जेष्ठ नागरिकहरू हुनेछन् ।
