झापाको जामुनबारी चोकमा कोशीको पूर्वमुख्यमन्त्री उद्धव थापामाथि आक्रमण
झापा । कोशी प्रदेशका पूर्वमुख्यमन्त्री उद्धव थापामाथि झापामा आक्रमण भएको छ । आक्रमणबाट थापाको देब्रे आँखाको माथिल्लो भागमा चोट लागेको छ। बिर्तासिटी हस्पिटल बिर्तामोडमा उपचारपछि उनी डिस्चार्ज भएका छन् ।
नेपाल प्रेस युनियन झापाले दोमुखामा आयोजना गरेको वार्षिकसाधारण सभाबाट फर्किँदै गर्दा शनिबार साँझ थापामाथि कनकाई नगरपालिकास्थित जामुनबारी चोकमा आक्रमण भएको हो ।
थापामाथि बा१झ १८७० नम्बरको विद्युत् प्राधिकरण सुरुङ्गाको गाडीमा सवार कर्मचारीहरूले कुटपिट गरेको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिएका छन् ।
प्राधिकरणका कर्मचारी चढेको गाडीलाई थापा चढेको गाडीले ओभरटेक गरेको विषयमा विवाद हुँदा घटना भएको हो । प्रहरीले कुटपिटमा संलग्न प्राधिकरणका कर्मचारी भक्तबहादुर कटवाल र पृथ्वी श्रेष्ठलाई पक्राउ गरेको छ ।
