विपक्षी सात दलले भने-सरकारले भ्रष्टाचारी जोगाउने र भ्रष्टाचार बढाउने मात्र काम गर्यो
काठमाडौं । संसदमा रहेका सात विपक्षी दलले वर्तमान सरकार गठन भएको ६ महिना बितिसक्दा पनि जनअपेक्षाअनुरूप काम हुन नसकेको आरोप लगाएका छन् ।
शुक्रबारको बैठकपछि संयुक्त वक्तव्य जारी गर्दै विपक्षी दलले सरकारले महंगी र भ्रष्टाचारलाई बढावा दिएको, अन्तर्राष्ट्रिय सम्बन्ध सन्तुलित राख्न नसकेको र संसदलाई छलेर अध्यादेशमार्फत् जनतामा निरङ्कुश शासन लाद्न खोजेको आरोप लगाएका हुन् ।
संयुक्त वक्तव्यमा भनिएको छ, ’संसदको नियमित हिउँदे अधिवेशन बोलाएर कानुन निर्माण नगरी, संसदीय समितिमा छलफलको क्रममा रहेका विधेयकहरू फिर्ता समेत नलिई सोही विषयमा गम्भीर प्रकृतिका कानुनहरू अध्यादेशमार्फत् जारी गर्ने सरकारको कामप्रति हाम्रो गम्भीर ध्यानाकर्षण भएको छ । सरकारको यो कदमबाट संविधानको मर्म तथा भावनामाथि प्रहार हुनुका साथै संसदीय प्रणालीको उपहास गर्ने खतरनाक, स्वेच्छाचारी र निरङ्कुश प्रवृत्ति प्रदर्शन गरेको छ भन्ने हाम्रो ठहर छ ।’
त्यस्तै उनीहरुले सरकार र सत्तारुढ गठबन्धनका दलहरूको निहित स्वार्थ पूर्तिका लागि संसदलाई छलेर राष्ट्रको दूरगामी भविष्यमा गम्भीर असर पार्ने प्रकृतिका कानुनहरू अध्यादेशमार्फत् ल्याइएको भन्दै भत्र्सना गरेका छन् ।
