भीम रावल भन्छन्-बालेन साहसँग सहकार्यका विषयमा खुला छु
धनगढी । मातृभूमि जागरण अभियानका संयोजक डा. भीम रावलले राष्ट्रहितमा काम गर्ने जोसुकैसँग सहकार्य हुनसक्ने बताएका छन् ।
शुक्रबार धनगढी आइपुगेका रावलले पत्रकारहरुसँग कुरा गर्दै उनले यस्तो बताएका हुन् । उनले काठमाडौँ महानगरपालिकाका मेयर बालेन साहसँग सहकार्यका विषयमा आफू खुला रहेको बताए ।
उनले भने, ‘राष्ट्रहितमा अगाडि बढ्ने बालेनजी हुनुहुन्छ कि जोजो हुनुहुन्छ, ती सबलाई एकजुट गरेर राष्ट्रको हितमा अगाडि बढ्छौँ ।’
उनले आफूमाथि लगाइएको राजावादीसँगको साँठगाँठको आरोपको खण्डन गरे । उनले आफूसँग नागरिक, बुद्धिजीवी, राजनीतिक दलसँग आवद्ध व्यक्तिहरू रहेको र सबैसँगको छलफल गरी अघि बढ्ने बताए ।
उनले ठूला राजनीतिक दल गन्तव्यहीन, आदर्शहीन र सिद्धान्तहीन भएको आरोप लगाए । रावलले प्रधानमन्त्रीसहित राजनीतिक नियुक्तिमा भागबण्डा गरेर खाने गरेको भन्दै त्यसलाई रोक्नुपर्ने बताए ।
