एमालेका अर्का नेतामाथि पनि कारबाही, नेतृत्वविरुद्ध आलोचना गरेको आरोप
विराटनगर । नेकपा एमालेले कोशी पूर्वसांसद विमल कार्कीलाई कारबाही गरेको छ । नेतृत्व र पार्टी निर्णयबिरुद्ध लगातार सामाजिक सञ्जालमा अफवाह फैलाउने काम गरेको अभियोगमा एमाले कोशीले नेता कार्कीलाई कारबाही गरेको हो ।
कोशी प्रदेशसभाका पूर्वसांसद कार्कीलाई एमालेले ६ महिनाका लागि पार्टीका सबै जिम्मेवारीबाट निलम्बन गरेको हो । पुस २७ गते बसेको कोशी प्रदेश कमिटीको बैठकले कार्कीलाई ६ महिनाका लागि निलम्बन गरेको एमाले कोशी अध्यक्ष घनश्याम खतिवडाले जानकारी दिए ।
‘६ महिनाका लागि उहाँलाई पार्टीका सबै जिम्मेवारीबाट निलम्बन गर्ने निर्णय भएको छ’, खतिवडाले भने । कार्कीलाई गत मंसिर १६ गते अध्यक्ष खतिवडाले तीन दिने स्पष्टीकरण सोधेका थिए ।
‘तपाईंको नामको फेसबुक आइडीबाट पार्टी नेतृत्वविरूद्ध लगातार अभिव्यक्ति आइरहेको छ । त्यो फेसबुक आइडी तपाईंको हो कि होइन, हो भने तपाईंलाई किन कारबाही नगर्ने ?’
कार्कीलाई सोधिएको स्पष्टीकरणमा भनिएको थियो । कार्कीले तोकिएको समय सीमाभित्र स्पष्टीकरण नबुझाएको र स्पष्टीकरण पनि चित्त बुझ्दो नभएको भन्दै प्रदेश कमिटीले ६ महिना निलम्बनको निर्णय गरेको हो ।
कार्कीले पछिल्लो समय एमालेबिरुद्धको अफवाह फैलाउने बिरोधी समूहलाई सघाउँदै एमालेमै रहेर एमाले सकाउने अस्त्र अर्थात ‘आलोचनात्मक चेत’ भन्दै नेतृत्व र पार्टी निर्णयबिरुद्ध नै जथाभावी लेखेका थिए ।
