संविधान संशोधन २०८७ हुन्छ भन्ने प्रधानमन्त्रीको भनाईको एमाले नेता भट्टराईले गरे बचाऊ

काठमाडौं । नेकपा एमालेका नेता खिमलाल भट्टराईले संविधान संशोधन २०८७ सालमा हुने प्रधानमन्त्री केपी शर्मा ओलीको अभिव्यक्तिको बचाउन गरेका छन् ।

बिहीबार सामाजिक संजालमार्फत भट्टराईले प्रधानमन्त्रीको आशय त्यस्तो नभएको बताएका हुन् । उनले संविधान संशोधनको निम्ति आवश्यक संख्या पुर्याउन २०८७ सालसम्म पर्खिनु पर्ने हुनसक्छ भनेर प्रधानमन्त्रीले परिस्थितिको विश्लेषण गरेको दाबी गरेका छन् । प्रधानमन्त्री ओलीले केन्द्रीय कमिटी बैठक समापनमा बोल्दै संविधान संशोधन आगामी २०८७ सालमा हुने बताएका थिए । प्रधानमन्त्रीको भनाईप्रति सत्तारुढ नेपाली कांग्रेसले आपत्ति जनाइसकेको छ ।

यस्तो छ खिमलाल भट्टराईको भनाई
प्रधानमन्त्री एवं पार्टी अध्यक्ष कमरेड केपी शर्मा ओलीले संविधान संशोधनको विषयमा बोल्नु भएको कुरालाई लिएर नेपाली काँग्रेसका नेताहरु र अन्य विभिन्न सामाजिक संजालहरु उद्वेलित भएको देखियो । केन्द्रीय कमिटीको बैठकमा उहाँको सम्बोधन सुनेको मैले बुझेको कुरा यस्तो होः

संविधान संशोधनको लागि सरकारले आन्तरिक तयारी गरिराखेकै छ । यसको आवश्यकता र औचित्यको विषयमा अध्यक्षको कुनै फरक विचार छैन भन्ने स्पष्ट नै छ । तर अहिले संविधान संशोधनका लागि दुवै सदनमा चाहिने दुई तिहाई बहुमत नेकपा (एमाले) र नेपाली काँग्रेससँग छैन । राष्ट्रियसभामा समेत दुई तिहाई नभई संविधान संशोधन संभव छैन । आउने राष्ट्रियसभाको चुनावमा पनि गणितीय संख्या पुग्नेगरि जित्न मुश्किल छ । त्यसैले संविधान संशोधनको निम्ति आवश्यक संख्या पुर्याउन २०८७ सालसम्म पर्खिनु पर्ने हुनसक्छ भनेर परिस्थितिको विश्लेषण गर्नु भएको हो ।

आवश्यकताको सिद्धान्त अनुसार सही र सामयिक विषयमा संशोधन गर्न सत्तारूढ दलहरु तयार छँदैछन् । यसको अलावा अरु दलहरु समेत तयार हुँदा संशोधनको प्रक्रियामा ढिलाई हुने प्रश्नै छैन ।कमरेड अध्यक्षको सम्बोधनको मूल मर्म यही नै हो । सात बुँदामा संविधान संशोधनको बुँदा के देखेका थिए कतिपयले आफ्नो अतिवादी विचारको प्रचार थालेका छन् । त्यो चाहिँ संभव छैन ।