१४ बुँदे प्रस्ताव पारित गर्दै एमाले केन्द्रीय कमिटी बैठक सम्पन्न, संविधान संशोधन प्रक्रिया अघि बढाउन सरकारलाई आग्रह

काठमाडौं । नेकपा एमालेले अहिलेको गठबन्धन सरकार बनेपछि जनतामा आशा जागेको निष्कर्ष निकालेको छ ।

पार्टी केन्द्रीय कमिटी बैठकले काङ्ग्रेससँगको गठबन्धन सरकारले महत्त्वपूर्ण उपलब्धि हासिल गरेको निष्कर्ष निकाल्दै यसले जनतामा उत्साह जगाएको ठहर गरेको हो । बैठकपछि एमाले प्रचार विभाग प्रमुख राजेन्द्र गौतमले नयाँ सरकार बनेपछि धेरै उपलब्धि प्राप्त भएको बताए ।

उनले बेरोजगारी, भ्रष्टाचार लगायतका समस्याविरुद्ध सक्रियतापूर्वक लाग्न बैठकले सरकारको ध्यानाकर्षण गराएको बताए । बैठकमा केन्द्रीय सदस्यले उठाएका प्रश्नको जवाफ दिँदै अध्यक्ष केपी शर्मा ओलीले अहिले एमालेमाथि चौतर्फीरूपमा प्रहार भइरहेको बताएका थिए ।

उनले जति नै प्रहार भएपनि दृढताका साथ दह्रो भएर उभिने समेत बताए । एमालेले देशमा महान् काम गरिरहेको भन्दै अध्यक्ष ओलीले त्यसको रिस डाह गर्नेहरूले अनेक लाञ्छना लगाएर कमजोर बनाउने प्रयास गरिरहेको दाबी समेत गरे ।

यस्ता प्रयासविरुद्ध एक ढिक्का भएर लड्न उनले पार्टीका नेताकार्यकर्तालाई आव्हान पनि गरेका छन् । अध्यक्ष ओलीले पेस गरेको प्रतिवेदन पारित गर्दै एमालेको केन्द्रीय कमिटी बैठक सकिएको छ ।

बैठकले  संविधान संशोधनको प्रक्रिया अघि बढाउन सरकारलाई आग्रह गर्ने निर्णय गरेको छ । बैठकले १४ बुँदे प्रस्ताव पारित गरेको छ ।