शासकीय जिम्मेवारी लिएका दलहरू नै संघीयताप्रति अनुदारः महामन्त्री थापा
काठमाडौँ । नेपाली कांग्रेसका महामन्त्री गगन थापाले सबै राजनीतिक दल संघीय व्यवस्थाप्रति अनुदार देखिएका बताएका छन् ।
मंगलबार ‘संघीयता सवलीकरणको कसीमा प्रदेशका सवालहरू’ विषयक छलफलमा महामन्त्री थापाले शासकीय जिम्मेवारी लिएका दलहरू नै संघीयताप्रति अनुदार रहेको बताएका हुन् । उनले नयाँ, पुराना र क्षेत्रीय दल सबै संघीयताप्रति अनुदार देखिएको आफूले पाएको बताए ।
महामन्त्री थापाले संघीय कानुन नबनाए सररकार छाड्छु भनेर कसैले नभन्ने र सरकारमा गएपछि ऊ नै अनुदार देखिने गरेको बताए ।
उनले भने, ‘निजामती विधेयक र प्रहरी विधेयक पारित नहुने भए म सरकारबाट बाहिरिन्छु भनेर आजसम्म कसैले भनेको सुनेको छैन । कसैले भन्दैन । सबैले बाहिर भन्छन् । सरकार चलाउने ठाउँमा गइसकेपछि अधिकारलाई कसरी मुठीमा राखिराख्ने भन्नेमै हुन्छौँ। यसले गर्दा दुर्घटना हुन्छ ।’
उनले मधेस र माओवादी आन्दोलनको पनि निकै ठूलो महत्त्व रहेको बताए । उनले संघीयताको विषयमा कांग्रेस एमालेमा बहस गर्नुपर्ने बताए ।
