तत्काल मित्र पार्टीहरुसँग मोर्चामा सहकार्य गर्दै क्रान्तिकारी ध्रुवीकरणलाई तिब्रता दिने विप्लव नेतृत्वको नेकपाको निर्णय
काठमाडौं । नेत्रविक्रम चन्द विप्लव नेतृत्वको नेपाल कम्युनिष्ट पार्टी (नेकपा) ले आगामी २०८४ को आमुचनावमा भाग लिने भएको छ ।
मंसिर २७ गतेदेखि पुस २ गतेसम्म कपिलवस्तुको शिवगढीस्थित केन्द्रीय कार्यालयमा बसेको छैटौं पूर्ण बैठकले आगामी निर्वाचनमा भाग लिने निर्णय गरेको हो ।
मंगलबार पत्रकार सम्मेलन गरी नेकपाले पार्टी गठनको १० वर्ष पुगेकाले पार्टीको विचार र प्रस्तावहरूको पक्षमा देशव्यापी अन्तक्रिया गर्ने निर्णय भएको जानकारी दिएको छ ।
बैठकको निर्णयमा भनिएको छ, ‘आगामी २०८४ को चुनावलाई राष्ट्रिय स्वाधीनता, उत्पीडित वर्ग, जाति, समुदाय, महिला, युवा विद्यार्थी र नेपाली विशेषताको समाजवादका पक्षमा प्रयोग गर्ने निर्णय गरिएको छ । त्यसका लागि जनतालाई स्पष्ट सन्देश दिन पार्टी दर्ता गरेर उपयुक्त चुनाव चिन्ह लिइनेछ ।’
त्यस्तै नेकपाले भ्रष्टाचार, सुकुम्बासी, मिटरब्याज, वैदेशिक हस्तक्षेपलगायतविरुद्ध जनमार्च अभियान सञ्चालन गर्ने भएको छ । बैठकले क्रान्तिकारी पार्टीहरुसँग एकताको उद्देश्य राख्दै तत्काल मित्र पार्टीहरुसँग मोर्चामा सहकार्य गर्दै क्रान्तिकारी ध्रुवीकरणलाई तिब्रता दिने निर्णय पनि गरेको छ ।
