जुन स्पिरिटमा यो सरकार हिँड्नुपथ्र्यो, सकेनः शेखर कोइराला
जनकपुरधाम । नेपाली कांग्रेसका नेता डा. शेखर कोइरालाले केन्द्रमा बसेका नेताहरुले संघीयताको मर्मअनुरुप काम गर्न नसकेको आरोप लगाएका छन् ।
जनकपुरधाममा आइतबार प्रेस युनियनले गरेको पत्रकार सम्मेलनमा कोइरालाले प्रदेश सरकारको कामबाट जनतामा वितृष्णा बढिरहेको जिम्मा केन्द्रका नेताले लिनुपर्ने बताएका हुन् ।
उनले भने, ‘संघले निजामती ऐन, शिक्षा ऐन तथा प्रहरी ऐन बनाएर नदिँदा प्रदेश सरकारहरुले आफ्नो गतिमा काम गर्न सकेका छैनन् । ती ऐन संघ सरकारले नदिनुको पछाडिको एउटै कारण छ, केन्द्रमा बसेका नेताहरुले संघीयताको मर्म बुझेका छैनन् ।’
कोइरालाले वर्तमान सरकारको काम सन्तोषजनक नरहेकोसमेत बताए । उनले राजनीतिक स्थायित्वका साथै देशमा सुशासन कायम गर्नका लागि दुई ठूला दल मिलेर सरकार बनाएपनि त्यो स्पिरिट अनुरुप सरकार हिँड्न नसकेको बताए ।
उनले भने, ‘दुई ठूला दल मिलेर बनेको यो सरकारको काम सन्तोषजनक छैन तर यो सरकारलाई असफल हुने छुट पनि छैन ।’
यो सरकार असफल भएमा देशमा अराजकता बढ्ने कोइरालाको भनाई छ । फरक प्रसंगमा उनले पार्टी सभापति शेरबहादुर देउवासँग आफ्नो मनमा कुनै किसिमको राग द्वेश नरहेको स्पष्ट पारे ।
