माओवादीप्रति नेपाली जनताको यो भरोसालाई अलिकति पनि डगमगाउन दिनेछैनः प्रचण्ड
बुटवल । नेकपा (माओवादी केन्द्र)का अध्यक्ष पुष्पकमल दाहाल प्रचण्डले पछिल्लो समय माओवादीप्रति जनलहर बढ्दै गएको बताएका छन् ।
शनिबार रुपन्देहीको तिलोत्तमामा आयोजित नेकपा (माओवादी केन्द्र)सँग राष्ट्रिय जनमुक्ति पार्टी समाहित तथा राजनीतिक प्रशिक्षण कार्यक्रमलाई सम्बोधन गर्दै अध्यक्ष प्रचण्डले उपनिर्वाचनको त्यसको पुष्टि गरेको बताएका हुन् ।
उनले अब नेपाली जनताको यो भरोसालाई अलिकति पनि तोड्न नदिने बताए । उनले भने, ‘पछिल्लो समय जहाँ गयो, त्यही पार्टी नेतृत्वप्रति जिन्दावादको नारा लागेको छ । नेपाली जनताको यो भरोसालाई अलिकति पनि तोड्न दिने छैन । हामी समाजवादी नयाँ आन्दोलनमार्फत त्यसको प्रतिवाद गर्नेछौँ । भर्खरै सम्पन्न स्थानीय तहको उपनिर्वाचनले को सिकिँदै छ र को रिभाइभ भएर आउँदै छ भन्ने देखाइसकेको छ।’
माओवादी केन्द्रको नेतृत्वमा बनेका सरकारले गरेका काम र अगाडि बढाएका योजनालाई जनताले सकारात्मक ढङ्गले बुझ्दै गएका कारण माओवादी केन्द्रलाई जनताले माया गर्न थालेको उनले बताए ।
आफू सरकारमा रहँदा भ्रष्टाचारविरुद्ध सुशासनको अभियान, सामाजिक न्याय, राष्ट्रको हितमा छिमेकी र अन्य राष्ट्रहरूसँग राम्रो सम्बन्ध कायम गर्दै दूरगामी रूपमा राज्यलाई फाइदा हुने गरी चीन र भारतसँग सहमति र सम्झौता गरेको उनले बताए ।
