कोशीमा कोइराला पक्षले भेलाको तयारी गरेपछि केन्द्रले भन्यो-मंसिर २२ अघि कुनै कार्यक्रम छैन
काठमाडौं । नेपाली कांग्रेसका नेता डा शेखर कोइराला पक्षले कोशी प्रदेशका पालिका सभापतिहरूको भेला आयोजना गर्ने तयारी गरेको भन्दै केन्द्रले कुनै भेला नभएको भन्दै परिपत्र गरेको छ ।
कोशी प्रदेशका १४ वटै जिल्ला सभापतिहरूलाई केन्द्रीय कार्यालयले परिपत्र गर्दै मंसिर २२ गतेको प्रदेश सम्मेलनबाहेक त्यसअघि अन्य कुनै भेला नभएको बताएको हो ।
परिपत्रमा भनिएको छ, ‘मसिर २२ पूर्व–कोशी प्रदेश स्तरीय पालिका सभापतिहरूको भेला भनि प्रचारित कार्यक्रममा सहभागी हुनुपर्ने–नपर्ने स्पष्टताका लागि जिल्लाहरूबाट केन्द्रमा सम्पर्क गरिएकाले, मंसिर २२ मा हुने सम्मेलन पूर्वप्रदेश स्तरीय पार्टीको कुनै पनि कार्यक्रम नरहेको जानकारी यस सम्बन्धमा प्रदेश अन्तर्गत रहेका सम्पूर्ण पालिकाहरूलाई आवश्यक जानकारी गराई दिन हुन समेत निर्देशानुसार अनुरोध छ।’
कांग्रेस प्रदेश समितिका सभापति संस्थापन पक्षमा रहेका नेता कृष्णप्रसाद सिटौला निकट उद्धव थापा छन् । थापा नेतृत्वको प्रदेश समितिले मंसिर २२ गते प्रदेश सम्मेलन गर्ने तय गरेको छ । तर त्यसअघि कोइराला पक्षले भने मंसिर १८ र १९ गते विराटनगरमा पालिका सभापतिहरूको भेला राखेको भन्दै पत्रकार सम्मेलन गरेको थियो ।
