राष्ट्रिय स्वतन्त्र पार्टीका नेताहरुविरुद्ध अदालतको अवहेलना मुद्दा दर्ता
काठमाडौँ । राष्ट्रिय स्वतन्त्र पार्टीका नेताहरुविरुद्ध सर्वोच्च अदालतमा रिट दर्ता भएको छ । पार्टी सभापति रवि लामिछानेमाथि सहकारीको रकम अपचलनमा अनुसन्धान भइरहेका बेला अदालतको गतिविधिविरुद्ध आन्दोलन गरेको दाबीसहित बिहीबार सर्वोच्च अदालतमा रिट दर्ता भएको हो ।
अधिवक्ता अनुपम भट्टराईले अनुसन्धानमा रहेको चरणमै अदालतलाई दबाब दिने उद्देश्यले अवरोध गर्न खोजेको दाबी मुद्दा दर्ता गराएका हुन् । रिटमा रास्वपाका सांसदहरू डा. स्वर्णिम वाग्ले, प्रवक्ता मनिष झा, सुमना श्रेष्ठ, विराजभक्त श्रेष्ठ, तोषिमा कार्की, सोबिता गौतमलगायतलाई विपक्षी बनाइएको छ ।
रिटको मङ्सिर तीन गतेको लागि पेसी तोकिएको छ । यसअघि उक्त रिट सर्वोच्च प्रशासनले दर्ता गर्न अस्वीकार गर्दै दरपीठ गरेको थियो । त्यसविरुद्ध भट्टराईले कात्तिक २१ गते इजलासमा निवेदन दिएका थिए ।
उक्त निवेदनमा पहिलो सुनुवाइ गर्दै न्यायाधीश शर्माको इजलासले दरपीठ बदर गरेसँगै मुद्दा दर्ता भएको हो । रिटमा रास्वपाका नेताहरुलले न्याय निरूपण प्रक्रियाको उपहास गरी सभा गर्ने, न्यायपालिका बारे तथ्यहीन र आधारहीन कुरा जनतामा फैलाउने लगायतका कार्य गरी स्वतन्त्र न्यायपालिका माथि जनमानसमा भ्रम सिर्जना गर्ने काम गरेको दाबी गरिएको छ ।
सहकारी ठगी प्रकरणमा सभापति लामिछानेविरुद्ध अनुसन्धान भइरहेका बेला रास्वपाका नेताहरुले विरोध प्रदर्शन गर्दै आएका छन् ।
