उपनिर्वाचनका लागि कांग्रेसले खटायो सातै प्रदेशमा केन्द्रीय नेता
काठमाडौं । नेपाली कांग्रेसले आगामी मंसिर १६ गते हुने स्थानीय तहको उपनिर्वाचनमा समन्वय गर्न र पार्टीका उम्मेदवारलाई विजयी बनाउन नेताहरुलाई जिम्मेवारी तोकेको छ ।
बुधबार महामन्त्री विश्वप्रकाश शर्माको अध्यक्षतामा बसेको बैठकले उप–निर्वाचनमा पार्टीका उम्मेदवारहरुलाई विजयी बनाउन प्रदेश, जिल्ला र स्थानीय कार्यसमितिसँग आवश्यक, समन्वय र सहजीकरण गर्न नेताहरुलाई जिम्मेवारी तोकेको हो ।
कांग्रेसले बागमती प्रदेशमा महालक्ष्मी उपाध्याय ‘डिना’, कोशी प्रदेशमा भीष्मराज आङ्दम्बे, मधेश प्रदेशमा महेन्द्र यादव, कर्णाली प्रदेश एवं गण्डकी प्रदेशमा जीवन परियार, अन्तर पार्टी समन्वय गर्न डा. प्रकाशशरण महत, सुदूरपश्चिम प्रदेशमा एनपी. साउद, लुम्बिनी प्रदेश एवं निर्वाचन आयोग समन्वयमा पुष्पा भुसाल, प्रचार प्रसार संयोजनमा मीन विश्वकर्मा, स्थानीय तह समन्वयमा मधु आचार्य र नानु बाँस्तोलालाई सचिवालय व्यवस्थापनको जिम्मेवारी तोकेको छ ।
बैठकले उप–निर्वाचनमा पार्टीका उम्मेदवारहरुलाई विजयी गराउन सम्पूर्ण एकता, सालिनता र सकृयताका साथ अघि बढ्ने निर्णय पनि गरेको छ ।
