यस्ता अभिव्यक्ति दिन न रतनले पाउँछन् नत आरसीले नै
नारायण पौडेल ।
जापानमा रहेका रतन कार्कीले साफ महिला फाइनलका दिन कसैको हत्या गर्नलाई उपयुक्त मौका छ भन्ने अपीलसहितको भिडियो पोष्ट गरे । उनले भिडियोमा प्रधानमन्त्री ओलीको नाम लिएका छैनन् तर उनको अभिव्यक्ति प्रधानमन्त्री ओलीतर्फ लक्षित हो भनि अनुमान गर्न सकिन्छ । जोसुकैको किन नहोस्, हत्यालाई प्रोत्साहन गर्ने कुरा गलत छ । तर, यस्ता गलत क्रियाकलापलाई मलजल स्वयं ओलीहरुले गरेका हुन् । नजिर त्यसै भन्छ ।
एमालेका युवा नेता आरसी लामिछानेले तत्कालीन प्रधानमन्त्री प्रचण्डको टाउको काटेर फुटबल खेल्ने भनेर सार्वजनिक भाषण गरे । एमालेका कार्यकर्ताले ताली ठोके । तत्कालीन सरकारले आरसीलाई कार्वाही गर्ने हल्ला चल्यो । ओलीले आरसीलाई धाप मारे । एमालेले आरसीसँग स्पष्टीकरण सोध्यो ? वक्तब्य फिर्ता लिन भन्यो ? वा अराजक अभिव्यक्ति दिएकोमा कारवाही गर्यो ? गरेन । आरसीले प्रचण्डको टाउको काट्ने र फुटबल खेल्ने सपाटरुपमै भनेका थिए । रतनले सांकेतिकरुपमा मात्र भनेका छन् ।
यसर्थ आरसीहरुलाई राजनीतिक संरक्षण दिएर रतनहरुलाई कारवाही गर्न प्रधानमन्त्री ओलीसँग नैतिक तागत बाँकी छैन । राजनीतिकरुपमा प्रचण्ड, देउवा, ओली वा जोसुकै सँग बिमति राख्न पाइन्छ । तर निजहरुको हत्या गर्ने अभिव्यक्ति दिन मिल्दैन । नत रतनले पाउँछन् नत आरसीले । जीवन इच्छाशक्ति अथाह रहेका र मृत्युलाई पटक पटक जितेका प्रधानमन्त्री ओलीलाई सताब्दी आयुका लागि शुभकामना !
