नेता कार्यकर्तालाई राहत तथा उद्धारमा जुट्न कांग्रेसको निर्देशन, विपद कोषमा ५० लाख जम्मा गर्ने निर्णय
काठमाडौं । नेपाली कांग्रेसले बाढीपहिरो पीडितका लागि ५० लाख सहयोग गर्ने निर्णय गरेको छ । आइतबार बिहान सभापति शेरबहादुर देउवाको निवास बूढानीलकण्ठमा बसेको केन्द्रीय कार्यसम्पादन समिति बैठकले बाढीपहिरो पीडितका लागि राहत कोषमा ५० लाख रुपैयाँ जम्मा गर्ने निर्णय गरेको प्रवक्ता प्रकाशशरण महतले जानकारी दिएका छन् ।
त्यस्तै बैठकले कांग्रेसका नेता तथा कार्यकर्ताहरूलाई बाढीपहिरोमा परेकाहरूको उद्धार तथा राहतमा जुट्न पनि निर्देशन दिएको छ।
बैठकले स्थानीय तहको उपचुनावको लागि दल दर्ता गर्ने निर्णय गरेको छ । उपचुनावका लागि उम्मेदवार तय गर्न पार्टी सभापति शेरबहादुर देउवालाई जिम्मा दिने निर्णय गरेको पार्टी प्रवक्ता महतले जानकारी दिए ।