प्रधानमन्त्री ओलीका कारण बाल दिवसको शुभकामना दिन सकिनँः मेयर साह

काठमाडौं । काठमाडौँ महानगरपालिकाका मेयर बालेन साहले प्रधानमन्त्री केपी शर्मा ओलीका कारण आफूले बाल दिवसको शुभकामना दिन नसकेको बताएका छन् ।

शनिबार राति सामाजिक संजालमार्फत मेयर साहले प्रधानमन्त्री ओलीका कारण न्याय नपाएर बालबालिकाहरूले ज्यान गुमाउन परेकाले बाल दिवसको शुभकामना दिन नसकेको बताएका हुन् ।

उनले भनेका छन्, ‘पीडित बालिकाहरूले प्रम (खड्ग प्रसाद ओली) को कारण न्याय नपाएर मर्नु परेको कारण बाल दिवसको शुभकामना दिन सकिनँ, सो शुभकामना स्वयं प्रम ज्यूलाई नै टक्राउन चाहन्छु, ग्रहण गर्नुहोला ।’

शनिबार दिउँसो आयोजित एक कार्यक्रममा प्रधानमन्त्री ओलीले बालेनलाई लक्षित गर्दै प्रतिवाद गर्न कार्यकर्तालाई निर्देशन दिएका थिए ।

न्यूरोडको फुटपाथ प्रकरण, प्रदेश सांसदले बालिका घरमा राखेर हिंसा गरेको तथा काठमाडौं उपत्यकाका नदी किनारमा दायाँबायाँ २० २० मिटर छाड्नुपर्ने सर्वोच्चको फैसला महानगरले कार्यान्वयन गर्न लागेको विषयलाई लिएर मेयर साहले प्रधानमन्त्री ओलीप्रति कटाक्ष गर्दै आएका छन् ।