एमाले नेता पोखरेल भन्छन्-बालेन ‘स्वघोषित’ पपुलर हुन्

काठमाडौं । नेकपा एमालेका केन्द्रीय सदस्य कृष्णभक्त पोखरेलले प्रधानमन्त्री केपी शर्मा ओलीलाई अहिले जबरजस्ती विवादमा पार्न खोजिएको बताएका छन् ।

बुधबार काठमाडौंमा आयोजितज साक्षात्कारमा पोखरेलले काठमाडौं महानगरपालिका प्रमुख मेयर बालेन साहलाई लक्षित गर्दै प्रधानमन्त्री ओली ‘अनपपुलर’ भन्ने भाष्य निर्माण नगर्न आग्रह गरेका हुन् ।

उनले भने, ‘अहिले जबरजस्तरुपमा केपी ओली ‘अनपपुलर’ भन्ने भाष्य निर्माण गर्न खोजिएको छ । हामी त्यसो चाहँदैनौं । लोकतन्त्रमा सबै फूलहरु फुल्न पाउनुपर्छ, हाँस्न पाउनुपर्छ भन्ने कुरा हो ।’

पोखरेलले लोकतन्त्रको विकल्प लोकतन्त्र नै हुने र एउटा दलको विकल्प अर्को दल हुने बताए । उनले काठमाडौं महानगरपालिकाका मेयरलाई स्वघोषित ‘पपुलर’को संज्ञा दिँदै दल खोलेर एमालेसँग प्रतिस्पर्धा गर्न आउन चुनौती दिए ।

उनले भने, ‘लोकतन्त्रको विकल्प लोकतन्त्र नै हो । एउटा दलको विकल्प अर्को दल हुनसक्ला । अरु साथीहरु आफूलाई स्वघोषित पपुलर भन्नुभएको छ, उहाँहरुले नि गरेहुन्छ नि त । दल खोलेर हामीसँग प्रतिस्पर्धामा आए हुन्छ । त्यो प्रतिस्पर्धाबाट जनताबाट अब्बल साबित भयो भने, आवधिक निर्वाचन प्रणाली लोकतन्त्रको सुन्दरता हो, हामी तयार छौं ।’

उनले प्रधानमन्त्री ओलीले बालेनलाई सहयोग नै गर्न चाहेको बताए । उनले भने, ‘ओलीजी र बालेन साहको बीचमा कुनै त्यस्तो म देख्दिनँ । ओलीले उहाँलाई जहिले पनि हामी उहाँलाई सहयोग गर्छौं भन्ने हिसाबबाटै कुरा राख्नुभएको छ । तर, बालेनजी लगाताररुपमा नेगेटिभ ढंगबाट प्रस्तुत हुनुभएको छ । प्रदेश सांसद रेखाजीको कुरा छ । उजुरी परेर प्रहरीले पक्राउ गर्ने प्रक्रिया किन थालेन ? एमालेले कहाँ बाधा गर्छ ?’