कमरेड प्रभाकरलगायत अन्यमाथि जे आशंका गरिएको छ त्यो गलत छः प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टी उपमहासचिव जनार्दन शर्माले पार्टी फुटाउँदैछ भनेर चलाएको हल्ला निराधार भएको बताएका छन् ।

बिहीबार पार्टी स्थायी कमिटी बैठकबाट बाहिरिने क्रममा पत्रकारहरुसँग कुरा गर्दै अध्यक्ष प्रचण्डले त्यो हल्ला निराधार भएको बताएका हुन् । उनले केही समयदेखि पार्टी फुट्छ भन्ने हल्ला भएपनि यहाँसम्म आइपुग्दा एकताबद्ध भएको बताए ।

उनले जनार्दन शर्मालगायतमाथि जे आशंका गरिएको छ, त्यो गलत भएको बताए । उनले भने,‘पार्टी फुट्छ भन्ने प्रचार धेरै भयो । कमरेड प्रभाकरलगायत अन्यमाथि जे आशंका गरिएको छ त्यो गलत छ ।’

पार्टी स्थायी कमिटी बैठकमा उपमहासचिव शर्माले केही दिनअघि लिखित प्रस्ताव पेस गर्दै आफूमाथि पार्टी फुटाउँदैछ भनेर प्रचार गरिएको भन्दै आपत्ति जनाएका थिए ।