नेपालको शान्ति प्रक्रिया विश्वकै नमुनाः प्रचण्ड

काठमाडौँ । नेकपा माओवादी केन्द्रका अध्यक्ष पुष्पकमल दाहाल प्रचण्डले नेपालको शान्ति प्रक्रिया विश्वकै नमुना भएको बताएका छन् ।

बुधबारको प्रतिनिधिसभा बैठकमा संक्रमणकालीन न्यायसम्बन्धी विधेयकमाथिको छलफलमा भाग लिँदै प्रचण्डले नेपालको शान्ति प्रक्रिया विश्वकै नमुना शान्ति प्रक्रिया भएको बताएका हुन् ।

शान्ति प्रक्रिया नमुना भएपनि जोखिम उठाएर हतियार व्यवस्थापनको काम गरेको बताए । उनले युद्धबाट शान्ति प्रक्रियामा आइसकेपछि आफ्नो पार्टी फुटाइएको बताए ।

आफ्नो पार्टी विभाजन भएर पनि देशमा शान्ति स्थापना भएकोमा आफूलाई गर्व रहेको बताए । उनले भने, ‘मैले सेना समायोजन गरेवापत मैले हतियार व्यवस्थापनको नेतृत्व गरेवापत मेरो पार्टी विभाजित भयो । निकै ठूलो जटिलता पार्टीले ब्यहोर्नुपर्यो । देश बच्यो, शान्ति स्थापित भयो, मलाई गर्व छ ।’

उनले आफ्नो विशेष पहलमा नै सेना समायोजन र हतियार व्यवस्थापनको काम सकिएको बताए । उनले राजतन्त्रको अन्त्य र संविधानसभाबाट नयाँ संविधानमार्फत राजनीतिक उपलब्धि प्राप्त भएको भन्दै फौजी पाटोलाई पनि सरल ढंगले स्थापित गरेको बताए ।

उनले अन्य राजनीतिक दलका नेताहरूले ‘माओवादी जनयुद्ध’ भन्दा जातै जाला जस्तो गरेको भन्दै असन्तुष्टि जनाए । उनले भने,’माओवादी जनयुद्ध भन्दा जातै जाला जस्तो गर्नुहुन्छ । जबकी संविधानसभाबाट माओवादी जनयुद्ध भनेर लेखिएको छ । सभाको ध्यानाकर्षण गर्न चाहान्छु कि त्यही प्रस्तावनाको अनुच्छेद तीनमा छलफल हुँदा तत्कालीन समितिको सभापति कांग्रेसका पूर्णबहादुर खड्का नेतृत्वको समितिले गरेको निर्णय हो र संविधानसभाद्वारा पनि पारित भएको छ ।’

उनले शान्ति प्रक्रियालाई निष्कर्षमा पुर्याउँदै गर्दा भएका सहमतिलाई विस्मृतिमा लैजाने काम गर्न नहुने बताए । प्रचण्डले आफूलाई तत्कालीन प्रधानमन्त्री गिरिजाप्रसाद कोइरालाले शान्ति प्रक्रियाका बाँकी काम सक्ने जिम्मेवारी दिएर गएको पनि बताए ।

प्रचण्डले प्रधानमन्त्री केपी ओलीप्रति कटाक्ष गर्दै ओलीले हुन्छ भन्दा हुन्न बुझ्नु पर्ने र हुन्न भन्दा हुन्छ भनेर बुझ्नु पर्ने स्थिति रहेको टिप्पणी गरे ।

उनले भने, ‘बहुदलीय प्रतिस्पर्धाको नाममा दुईदलीय व्यवस्थामा लैजान खोजिएको त होइन भन्ने आशंका छ । हुन त प्रधानमन्त्रीजीले होइन भन्नुभयो, त्यही साबित होस् भन्ने अपेक्षा गर्दछु । केदेखि तर्सेको के देखेपछि झस्किन्छ भनेझैँ । उहाँले हुन्छ भनेपछि हुन्न बुझ्नुपर्ने स्थिति र हुन्न भनेपछि हुन्छ भन्ने स्थिति भएकाले बढो आशंकाको स्थिति कायम छ ।’