डेडिकेटेड र ट्रंक लाइनको महसुलमा छुट दिने अधिकार कसैलाई छैनः महामन्त्री थापा

काठमाडौं । नेपाली कांग्रेसका महामन्त्री गगन थापाले डेडिकेटेड र ट्रंक लाइनको महसुलमा कसैलाई छुट दिन नसकिने बताएका छन् ।

मंगलबारको प्रतिनिधिसभा बैठकमा महामन्त्री थापाले कसैले निर्देशन दिएर कसैलाई एक रुपैयाँ छुट दिन नहुने बताएका हुन् ।

उनले भने, ‘प्रयोग गर्नेको बक्यौता कसैले नउठाऊ भन्न पाइँदैन । एक रुपैयाँ पनि उठाउनुपर्छ । राज्यकोषको एक रुपैयाँ पनि तलमाथि हुन दिन्न भनेर सरकारले विश्वास दिलाउन सक्नुपर्छ । विधिको शासन भनेको त्यही हो ।’

महामन्त्री थापाले कांग्रेसको सत्तापक्ष र प्रतिपक्षमा रहँदा एउटै बोली हुनुपर्ने बताए । डेडिकेटेड लाइनका विषयमा लाल आयोगको प्रतिवेदन कार्यान्वयन गर्ने भनिएकाले सरकारले निरन्तरता दिनुपर्ने उनले बताए ।

कसैमाथि अन्याय हुन नदिने र जतिसुकै पहुँचवालालाई एक रुपैयाँ तलमाथि हुन नदिने विषय संसदमा प्रस्ट पार्नुपर्ने उनले बताए ।