‘स्काउट ड्रेसमा बाँसबारीका जुत्ता लगाएर बालमन्दिर हुँदै टीकापुर हिँडेको नक्कली भुटानीबन्धु भन्ने आँट गरुन्’

काठमाडौं । राष्ट्रिय स्वतन्त्र पार्टीका सभापति रवि लामिछानेल ठूला दुई दलको मिलन खतराको घण्टी भएको बताएका छन् । सोमबारको प्रतिनिधिसभा बैठकमा सभापति लामिछानेले प्रधानमन्त्रीको अभिव्यक्ति र हिजोको कांग्रेस महामन्त्रीको अभिव्यक्तिले त्यो कुरा स्पष्ट गरेको बताएका हुन् ।

उनले भने, ‘प्रधानमन्त्रीको अभिव्यक्ति, हिजोको कांग्रेस महामन्त्रीको अभिव्यक्ति र आज विषायन्तर गर्न खोज्नुभएको एमालेका पूराना नेताको अभिव्यक्तिले के देखाउँछ भने अब यी नयाँलाई ठीक पार्नुपर्छ, यीनलाई आरोप लगाईदिनुपर्छ, एउटा एउटा कुरा लगाईदिएपछि अनि यीनलाई ठीक गरेपछिमात्रै हाम्रो जोगिन्छ भनेर मिलेको कुरा स्पष्ट हुन आउँछ ।’

उनले मध्यरातमा खुफिया एजेन्सीका मान्छेहरुसँग होलिवाइन गर्ने काम भएको भन्दै प्रधानमन्त्री केपी शर्मा ओलीप्रति कटाक्ष गरेका छन् ।

उनले भने, ‘मलाई मध्यराति भएको होलिवाइनको विषयमा प्रश्न गर्ने मन छ । मध्यरातमा कुनै खुफिया एजेन्सीका मान्छेसँग होलिवाइनको विषय के हो ? कुनै विचौलियाको घरमा मध्यरातमा बसेर सरकार चलाउने दस्तखत गर्ने डक्ट्रिनको बारेमा पनि कुनै दिन खुलेर कुराकानी गरौंला ।’ उनले भ्रष्टाचारको फाइल आफूले खोलेको भन्ने जस नचाहिएको बताए ।

उनले भने, ‘हिजो यहाँ कुरा आयो फाइल हामीले खोलेका हौँ, तिमीहरूले खोलेको होइनौँ। ठिक छ तपाईँहरूले नै खोल्नुभएको हो हामीलाई जस चाहिएको छैन। काण्ड पनि हामीहरूले नै हो गरेको हो भन्दिएको भए राम्रो हुन्थ्यो । ३० औ वर्षमा यी काण्डहरू नि आफैंले गरेको हो। फाइल तपाईँहरूले नै खोल्नुभएको हो। तर बन्द नहुँदै जिउँदै रहेको फाइललाई तपाईँहरूले गाड्न खोज्नुभयो।’

सभापति लामिछानेले आफू केही समय नबोलौं भनेर चुप लागेर बसेको भएपनि पछिल्लो समय संसदमा आएका अभिव्यक्तिका कारण बोल्न बाध्य भएको बताए ।

उनले भने,‘मलाई थाहा छ, असार १५ मा खुवाइएको दहीले केहीबेर मुख बन्द भएको होला, तर लोकतन्त्रका हिमायती र यतिका सार्वभौम सांसदहरुको मुखमा दही जम्नेछैन ।’

उनले कान्तिपुर ग्रुपका अध्यक्ष कैलाश सिरोहियाको नागरिकता प्रकरणमा अझैपनि अनुसन्धान जारी रहेको बताए ।

सिरोहिया पक्राउ प्रकरणबारे कांग्रेस महामन्त्री विश्वप्रकाश शर्माले ‘खुदा पहाड, निक्ला चुहा’ भनेर भनेको प्रसंगमा लामिछानेले भने, ‘हाजिरी जमानीमा कोही छुटेका छन्, फेरि त्योपनि केही होइन भनेर उहाँले भनिदिनुहोला । टीकापुर जग्गा काण्डपनि अनुसन्धानको क्रममा छ । सम्मानित सदनलाई थाहा हुनुपर्छ यो कुरा । विभिन्न प्रकरणमा अनुसन्धान भैरहेको छ । फाइल म उहाँहरुलाई जिम्मा लगाउन चाहन्छु । हामी कुनै जस लिन चाहँदैनौं । तर, अनुसन्धानमा रहेको विषयलाई केही पनि होइन, पूर्वाग्रह साँधेको भनियो । त्यसप्रति गम्भीर ध्यानाकार्षण गराउन खोजेको हो ।’

उनले विगतमा भ्रष्टाचारका विषय उठाउने कांग्रेस महामन्त्रीद्वय गगन थापा र विश्वप्रकाश शर्माप्रति लक्षित गर्दै भने, ‘स्काउट ड्रेसमा बाँसबारी जुत्ता लगाएर बालमन्दिर हुँदै टीकापुर हिँडेको नक्कली भुटानीबन्धु भन्ने आँट गरुन् ।’