नयाँ सरकारले देशमा व्याप्त आर्थिक अराजकता तथा भ्रष्टाचारविरुद्ध युद्ध छेड्न सक्नुपर्छ

काठमाडौं । कांग्रेस–एमाले नेतृत्वमा नयाँ सरकार गठन भएसँगै राजनीतिक दलका नेता, बुद्धिजीबी, तथा राजनीतिक विश्लेषकहरुले सरकारलाई खबरदारी गरेका छन् । विद्यमान चुनौती सामना गर्दै जनताले आशा गरेका सबै सम्भावनालाई मूर्तरूप दिन उनीहरुले सरकारलाई खबरदारी गरेका हुन् । सत्तारुढ दलका नेताले सरकारलाई जनतामा छाएको निराशालाई आशामा बदल्न सुझाव दिएका छन् भने प्रतिपक्षमा रहेका दलका नेताले सुशासनका लागि निर्मम हुन सुझाव दिएका छन् । त्यस्तै बुद्धिजीबी र राजनीतिक विश्लेषकले भने सरकारलाई व्यंग्य गर्दै खबरदारी गरेका छन् ।

नेपाली कांग्रेसका महामन्त्री विश्वप्रकाश शर्मा सामाजिक संजालमा लेख्छन्, ‘शपथग्रहण गरिरहँदा प्रधानमन्त्री र मन्त्रीहरूले त्रिशूलीमा दुई बससँगै हराएका नागरिकको स्मृति गर्नुपर्छ, हाम्रो दायित्वबोध राम्रोसँग हुनसक्नेछ ! चुनौती चिर्दै नागरिक पंक्तिमा आशा भर्नुछ । सहकार्य भन्नू ‘पुराना प्रश्न’ को तिलांजली होइन । दृढ ढंगले उठाउने छौं । आज शपथको दिन केवल शुभकामना !’

अर्का कांग्रेस नेता डा.मीनेन्द्र रिजाल विद्यमान चुनौती सामना गर्दै जनताले आशा गरेका सबै सम्भावनालाई मूर्तरूप दिन सरकारलाई सुझाव दिएका छन् । उनी लेख्छन्, ‘नेपाली काङ्ग्रेस र नेकपा एमालेको सहमतिमा केपी. शर्मा ओलीको नेतृत्वमा गठित मन्त्रिपरिषद्लाई हार्दिक बधाई । विधमान चुनौती सामना गर्दै हामीले आशा गरेका सबै सम्भावनालाई मूर्तरूप दिन सफलता मिलोस, यही शुभकामना छ।’

तर माओवादी केन्द्रका नेता लेखनाथ न्यौपाने उही पुराना अनुहारबाट सफलता हातपर्नेमा आशंका व्यक्त गर्छन् । उनी भन्छन्, ‘उही अनुहार, उही असफलता र बदनामी । एउटै व्यक्ति जो सरदर योग्यता/योगदान भएका वा कमजोर/विवादित अथवा अलोकप्रिय/बदनामहरु पटक पटक उही जिम्मेवारी/पदमा जान्छन् वा जान किन मरिहत्ते गर्छन् ? यस्ता हर्कतले राज्य, समाज र नागरिकमाथि नकारात्मक प्रभाव यति गहिरोगरी परेको छ कि हर नागरिकमा निराशा र पलायनता एंव राज्य असफलतातिर गएको प्रष्ट छैन र ? यसको उपचार पार्टी संचालनको संस्कृति, नयाँ कानुनको प्रावधान साथै समाजमा सही र गलत छुट्याउन सक्ने स्वतन्त्र चेतना निर्माणबाट सम्भव हुन् कि ! लुतोसँगै समाज र राज्यका खराबीहरु अगुल्टोमा झोसेर फाल्न सके…!’

राष्ट्रिय स्वतन्त्र पार्टीका सभापति रवि लामिछाने सुशासनका विषयमा सरकारसँग सहकार्य गर्न तयार रहेको तर भ्रष्टाचारका मुद्दामा भने निर्मम ढंगले प्रस्तुत हुने बताउँछन् । उनी लेख्छन्, ‘नवनियुक्त प्रधानमन्त्री केपी शर्मा ओलीज्यू सहित सम्पूर्ण मन्त्रिमण्डललाई सफल कार्यकालको शुभकामना । हामी भ्रष्टाचार र विचलनका मुद्दामा निर्मम ढंगले प्रस्तुत हुनेछौं भने सुशासन र समुन्नतिका विषयमा सहकार्य गर्न तयार रहनेछौं।’

राजनीतिक विश्लेषक मुमाराम खनाल यो सरकारबाट ‘स्थिरता र सुशासन’को आशा गर्न नहुने बताउँछन् । उनी भन्छन्, यो सरकारको ‘स्थिरता र सुशासन’ त घाममा सुकाए हुन्छ। तर यसभन्दा अगाडि जनमत नभएका एक्काइसे/बत्तिसे दलका झुट, निकम्पापन र हिरोपन्थी राजनीतिक बचपनबाट कमसेकम कर्मचारीतन्त्रले अलिकति भएपनि मर्यादाको महसुस गरेको छ। उचित जनमत बिना सरकारमा जानु भनेको निम्तो बिनाको भतेर खानुजस्तै हो।’

नागरिक अगुवा दमननाथ ढुंगाना देशमा व्याप्त भ्रष्टाचार नियन्त्रण र संविधानको पुनरावलोकनको काम थाल्न सरकारलाई सुझाव दिन्छन् । उनी भन्छन्, ‘ओलीजीको प्रधानमन्त्रीत्वको नेपाली कांग्रेस सम्मिलित नयाँ ऐतिहासिक सरकारलाई बधाई त दिने तर कुन शब्दमा दिने ? पहिलो देशमा व्याप्त आर्थिक अराजकता तथा भ्रष्टाचारविरुद्ध युद्ध छेड्न सफल होस् । दोश्रो संविधानको पुनरावलोकन थालोस् ।’

अर्का राजनीतिक विश्लेषक डम्बर खतिवडा चाहिँ हिजो सत्तापक्षमा रहेका दललाई अहिले विपक्षमा पुगेपछि विपक्षको नाटक नगर्न सल्लाह दिन्छन् । उनको सुझाव छ, ‘लोकतन्त्रमा विपक्षी धैर्यता ठूलो गुण र सौन्दर्य हो । बेलायतमा लेवर पार्टी १४ वर्षमा शानदार जितसहित सत्तामा फर्कियो । भारतमा कांग्रेस ११ वर्षदेखि विपक्षमा छ, अझै कति वर्ष रहन पर्ने हो । यहाँ वर्ष त के महिनामै आत्तिएर मर्छन् । सरकारमा नलिइएका वा घोक्राइएकाहरुले विपक्षको नाटक नगरे कै राम्रो ।’

बुद्धिजीबी तथा पूर्वराजदूत निलाम्बर आचार्य सरकार सफल हुने वा नहुने भन्ने विषय उसको कार्यसंचालनमा भरपर्ने बताउँछन् । उनी भन्छन्, ‘अस्थिर र परिणामहीन सरकारहरूको शृंखलामा यो अर्को सरकार हुने हो । अथवा सार्थकरूपले फरक हुने हो सरकारकै कार्य सञ्चालनमा भरपर्छ । म तटस्थ छैन सरकारले आइपर्ने बिघ्नबाधा पार गर्न सकोस् सरकार सफल होस् भन्ने चाहन्छु ।’