मुकुल ढकाललाई साधारण सदस्य मात्र रहने गरी महामन्त्री र प्रवक्ताको जिम्मेवारीबाट हटाउने रास्वपाको निर्णय

काठमाडौं । राष्ट्रिय स्वतन्त्र पार्टी (रास्वपा)ले महामन्त्री डा. मुकुल ढकाललाई पार्टीका सबै जिम्मेवारीबाट हटाउने निर्णय गरेको छ । रास्वपाको मंगलबार बसेको केन्द्रीय समितिको बैठकले ढकाललाई केन्द्रीय सदस्य, महामन्त्री र प्रवक्ताको जिम्मेवारीबाट हटाउने निर्णय गरेको हो ।

अनुशासन आयोगको सिफारिस अनुसार केन्द्रीय समितिले साधारण सदस्य कायम राखेर अरु सबै जिम्मेवारीबाट हटाउने निर्णय गरेको नेतृ सोबिता गौतमले जानकारी दिइन् ।

पार्टी अनुशासनविपरीत गतिविधि गरेको भन्दै १४ असारमा उनलाई पार्टी अनुशासन आयोगले स्पष्टीकरण सोधेको थियो । १९ असारमा केन्द्रीय समितिले नै महामन्त्री पदबाट ढकाललाई सात दिनका लागि निलम्बित गरेको थियो ।

अब अनुशासन आयोगमा पुनरावेदन गर्नका लागि ढकाललाई ३५ दिनको समय दिने निर्णय पनि रास्वपाले गरेको छ । त्यस्तै, ढकालको समीक्षा यात्रा प्रतिवेदनको स्वामित्व भने पार्टीले नलिने भएको छ ।

ढकालले सभापति लामिछानेलाई समीक्षा यात्रापछि तयार पारेको प्रतिवेदन बुझाएका थिए । जसमा पार्टी सञ्चालन र सभापतिको कार्यशैलीप्रति कडा आलोचना गरिएको थियो ।

प्रतिवेदनमा उनले वर्तमान अवस्थामा रास्वपाको जनमत अत्यन्तै नाजुक रहेको र यही अवस्था रहे आगामी आम निर्वाचनमा विवेकशील साझाको अवस्थामा पुग्ने उल्लेख गरेका थिए ।