आफूलाई यो वर्ष प्रधानमन्त्री बन्छु जस्तो लाग्दैनः अध्यक्ष ओली
काठमाडौं । नेकपा एमालेका अध्यक्ष केपी शर्मा ओलीले आफू यो वर्ष प्रधानमन्त्री नबन्ने बताएका छन् । सोमबार प्रतिनिधिसभा बैठकबाट बाहिरिने क्रममा पत्रकारहरुसँग कुरा गर्दैै अध्यक्ष ओलीले आफूलाई यो वर्ष प्रधानमन्त्री बन्छु जस्तो नलागेको बताएका हुन् ।
उनले भने, ‘यसवर्ष त त्यस्तो लाग्दैन मलाई । जनताले म प्रधानमन्त्री बनेको देख्नु राम्रो कुरा हो ।’ गत शनिबार कांग्रेस सभापति शेरबहादुर देउवासँगको भेटपछि सत्तासमीकरणमा फेरबदल आउन लागेको चर्चा चलेको छ ।
भेटमा देउवाले ओलीलाई प्रधानमन्त्रीको प्रस्ताव गरेको बताइएको छ । त्यसपछि आइतबार र सोमबार ओली र प्रचण्डबीच घण्टौं छलफल भएको छ ।
