गण्डकीमा फणीन्द्र देवकोटा दोस्रो पटक बने मन्त्री
गण्डकी । सर्वोच्च अदालतको आदेशबाट सांसद पुनर्वहाली भएका नेपाल समाजवादी पार्टीका नेता फणीन्द्र देवकोटा पुनः मन्त्रीमा नियुक्त भएका छन् ।
मुख्यमन्त्री सुरेन्द्रराज पाण्डेले उनलाई ऊर्जा, जलस्रोत तथा खानेपानी मन्त्रीमा नियुक्त गरेका हुन् । देवकोटालाई प्रदेश प्रमुख डिल्लीराज भट्टले आइतबार पद तथा गोपनीयताको शपथ गराएका छन् । फ्लोर क्रस गरेर मुख्यमन्त्री सुरेन्द्र पाण्डेलाई मत दिएपछि उनी मन्त्री बनेका थिए ।
तर माओवादीले जेठ ३२ गते उनलाई कारबाही गरेपछि पद गुमाएका थिए । त्यसपछि मुख्यमन्त्री पाण्डेले मन्त्रिपरिषद् हेरफेर गरेका थिए । असार ६ गते मुख्यमन्त्री तथा मन्त्रिपरिषद्को कार्यालयले उनलाई मन्त्रीबाट हटाइएको सूचना प्रदेश प्रमुखको कार्यालयमा दिएको थियो ।
कारबाहीविरुद्ध उनी सर्वोच्च गएका थिए सर्वोच्च अदालतले कारबाहीको निर्णय कार्यान्वयन नगर्न अन्तरिम आदेश दिएपछि उनी सांसद पुनर्वहाली भएका छन् ।