जसको नीति उसकै नेतृत्व भन्ने मूल आधारमा हाम्रो पार्टी सञ्चालन हुन्छः खनाल
काठमाडौं । नेकपा एकीकृत समाजवादीका सम्मानित नेता झलनाथ खनालले पार्टीभित्र गुटबन्दी लागू नहुने बताएका छन् ।
शनिबार पार्टीको दशौं महाधिवेशनको तयारीकाबारेमा आयोजित पत्रकार सम्मेलनमा नेता खनालले आफूहरूले पार्टीभित्र गुटबन्दी नचाहेको र पार्टीलाई आपसी छलफल एवं वहसमार्फत अघि बढाउन प्रतिबद्ध रहेको बताएका हुन् ।
उनले जसको नीति उसकै नेतृत्व भन्ने मूल आधारमा पार्टी सञ्चालन गर्ने बताए । उनले भने, ‘पार्टी संगठन भनेकै कमरेडहरूलाई व्यवस्थापन गर्ने संरचना हो, यो स्वभाविक हो। पार्टीको सातौं महाधिवेशनसम्म एउटा नेता भए आठौंदेखि विभिन्न पदहरु सिर्जना गर्यौं । त्यही पदको आधारमा व्यवस्थापन गर्दै आएको हो। विचार र व्यवस्थापन दुवैको सन्तुलन मिलाएर हामी अगाडि बढ्नुपर्ने हुन्छ।’
उनले कसलाई कुन पद दिने भन्ने सन्दर्भमा आन्तरिक छलफल गरिरहेकाले चाँडै त्यो विषय टुंग्याउने जानकारी दिए । खनालले पार्टीभित्र गुटबन्दी नहुने दाबी गरे ।
उनले भने, ‘जहाँसम्म गुटगत भेलाका कुरा छन् मैले त्यो गुटबन्दी भन्ने चिज जान्दै जान्दिन। गरेँ भने पनि जान्दिन । उहाँहरूले नि गर्नुभएको जस्तो मलाई लाग्दैन। हामी नेताहरूसँग विभिन्न कमरेडहरू आउनुहुन्छ, कहिले यता कहिले उता छलफल गर्छौं। यो गुटबन्दी होइन एक आपसको छलफलको कुरा हो ।’