भनेको नटेर्ने मन्त्री फेर्न नसके आफैं पद छाड्न प्रधानमन्त्रीलाई महामन्त्री थापाको सुझाव

काठमाडौं । नेपाली कांग्रेसका महामन्त्री गगन थापाले आफूले भनेको मन्त्रीहरुले नेटेरे कि मन्त्री फेर्न सुझाव दिएका छन् । आइतबारको प्रतिनिधिसभा बैठकमा महामन्त्री थापाले आफूले भनेको नटेर्ने मन्त्री फेर्न नसके आफैं पद छाड्न सुझाव दिएका हुन् ।

उनले भने, ‘स्थानीय सरकारका प्रमुखहरुले समानीकरण अनुदान कटौतीको विषयमा प्रधानमन्त्रीसँग भेट्नुभएछ । त्यसक्रममा प्रधानमन्त्रीले भन्नुभएछ– मेरो त मन छ तर मन्त्रीले मानेनन् । यो संसदीय व्यवस्था हो । नटेर्ने मन्त्री फेर्ने, फेर्न नसके सिंहदरबार र बालुवाटारबाट डेरा सर्ने ।’

उनले समानीकरण अनुदान स्थानीय सरकारको अधिकार र संघीय सरकारको दायित्व भएको भन्दै संघ सरकार स्रोत छैन भनेर पन्छिन खोजेको बताए ।

उनले भने, ‘वडाको क्षेत्राधिकारमा बजेट हाल्न नलजाउने अनि स्रोत छैन भनेर कटौती गर्ने ?’